Գրողների միությունում թեմատիկ բանաստեղծություններ ընթերցմամբ նշվեց Պոեզիայի միջազգային օրը

ԵՐԵՎԱՆ, 21 ՄԱՐՏԻ, ԱՐՄԵՆՊՐԵՍ: Հայ և օտարազգի բանաստեղծները սիրո, գեղեցկության, պոեզիայի մասին բանաստեղծություններ ընթերցեցին մարտի 21-ին Հայաստանի գրողների միությունում կայացած ցերեկույթին` նվիրված Պոեզիայի միջազգային օրվան:

«Հայ ժողովուրդը դարեր շարունակ սիրել է պոեզիա, երգել է, ասմունքել է ու տարածել այն: Արդեն վեցերորդ տարին է, որ միությունում նշում ենք այս օրը ու ամեն տարի փորձում ենք թարմ ստեղծագործություններ ներկայացնել` հրատարակված տարբեր լեզուներով: Վերջերս Ղազախստանում լույս տեսավ «Հայ միջնադարյան և ժամանակակից պոեզիա» գիրքը, որում ղազախերեն ներկայացված է մեր պոեզիան: Գրքի առաջաբանը գրել ենք Ղազախստանի գրողների միության նախագահն ու ես: Այս համագործակցությունը շարունակական է լինելու: Նախատեսում ենք նաև ժամանակակից բանաստեղծների ստեղծագործությունների անթոլոգիա լույս ընծայել ղազախերենով, ռուսերենով և հայերենով»,-«Արմենպրես»-ի հաղորդմամբ` նշեց գրողների միության նախագահ Էդվարդ Միլիտոնյանը:

Նա ուրախությամբ հայտնեց, որ պոեզիայի միջազգային օրվա կապակցությամբ միությունը հյուրընկալել է բանաստեղծների Ռուսաստանից, Իսրայելից, Բելառուսից:

Գրող Լարիսա Կուզմինսկայան հիշեցրեց, որ բոլորին համախմբել է պոեզիայի տոնը: «Մենք պոետներ ենք, ստեղծագործողներ և տարբերվում ենք մյուս մարդկանցից: Մեր ժողովածուներում ընդգրկում ենք հեղինակների գործեր, որոնք ապրում և ստեղծագործում են աշխարհի տարբեր ծայրերում: Հրատարակում ենք թարգմանություններ»,-ներկայացրեց նա` շեշտելով, որ շատ երջանիկ են, որ Հայաստանում են, քանի որ մեր երկրում մարդիկ ջերմ են, գեղեցիկ ճարտարապետական կառույցներ կան ու մշակույթ:

Բանաստեղծ Արևշատ Ավագյանի խոսքով` 21-րդ դարում կարծես պոեզիայի նկատմամբ հետաքրքրությունը կորում է, բայց այդպես չէ: «Բանաստեղծությունն ապրում է, շատ լավ ստեղծագործություններ են հրատարակվում, հանդիպումներ են կազմակերպվում նաև միջազգային հարթակներում»,-նշեց նա ու ընթերցեց «Պոեզիա» վերտառությամբ բանաստեղծությունը:

Բանաստեղծ, թարգմանիչ Շանթ Մկրտչյանը շեշտեց, որ պոեզիան մշտապես հաղթանակելու է:

Հասարակության լայն շերտերի ուշադրությունը պոեզիայի վրա բևեռելու նպատակով 1999 թվականին ՅՈՒՆԵՍԿՕ-ի 30-րդ վեհաժողովում որոշում ընդունվեց մարտի 21-ը նշել որպես պոեզիայի միջազգային օր: Որոշման մեջ նշվում է, որ պոեզիան կարող է պատասխան տալ ժամանակակից մարդու առջև ծառացած ամենասուր և ամենախոր հոգևոր խնդիրներին:

Պոեզիայի միջազգային օրն առաջին անգամ նշվել է Փարիզում, որտեղ գտնվում է ՅՈՒՆԵՍԿՕ-ի կենտրոնակայանը: Այս օրը հնարավորություն է ընձեռում փոքր հրատարակչություններին բարձրաձայնել իրենց մասին, քանի որ նաև նրանց ջանքերով են ընթերցողին հասնում ժամանակակից պոետների գործերը:

ՅՈՒՆԵՍԿՕ-ն կոչ է անում այս օրը զանգվածային լրատվամիջոցներում տարփողել պոեզիան՝ որպես ժամանակակից արվեստ, որը բաց է մարդկանց համար: