Անի Սամսոնյանը Երևանի ավագանու մանդատից հրաժարվելու դիմում է ներկայացրել. նա պատգամավորի մանդատ կստանա
1 րոպեի ընթերցում
ԵՐԵՎԱՆ, 10 ՀՈՒՆՎԱՐԻ, ԱՐՄԵՆՊՐԵՍ: Երևանի ավագանու «Լույս» խմբակցության անդամ Անի Սամսոնյանը Երևանի քաղաքապետին ավագանու մանդատից հրաժարվելու դիմում է ներկայացրել: Ինչպես հաղորդում է «Արմենպրես»-ը, Անի Սամսոնյանն այս մասին հայտնել է «Ֆեյսբուք»-ի իր էջում կատարած գրառման միջոցով:
«Դիմում գրեցի Երևանի քաղաքապետ Հայկ Մարությանին Երևանի ավագանու մանդատից հրաժարվելու վերաբերյալ։
Այսօր ժամեր անց նորընտիր Ազգային ժողովի պատգամավորները կստանձնեն իրենց մանդատները՝ այդ թվում նաև ես»,- գրել է նա։
Անի Սամսոնյանը դեկտեմբերի 9-ին ՀՀ-ում կայացած արտահերթ խորհրդարանական ընտրությունների արդյունքներով ընտրվել է Ազգային ժողովի պատգամավոր «Լուսավոր Հայաստան» կուսակցության ցուցակով: Նորընտիր պատգամավորներին մանդատների հանձնման հանդիսավոր արարողությունը տեղի կունենա հունվարի 10-ին: