2 րոպեի ընթերցում
ԵՐԵՎԱՆ, 2 ՆՈՅԵՄԲԵՐԻ, ԱՐՄԵՆՊՐԵՍ: ՀՀ փոխվարչապետի պաշտոնակատար Տիգրան Ավինյանը տեղյակ է եղել իր օգնական Միքայել Նահապետյանի հրաժարականի մասին: «Արմենպրես»-ի հաղորդմամբ՝ «ArmProd EXPO 2018» 17-րդ միջազգային մասնագիտացված ցուցահանդեսի պաշտոնական բացմանը լրագրողների հետ զրույցում Տիգրան Ավինյանն ասաց, որ Նահապետյանի նկատմամբ իր վերաբերմունքը բացարձակապես չի փոխվել և դրական է: «Նա շատ լավ աշխատակից է, և ես ցավով եմ նշում, որ պետք է հրաժեշտ տանք իրար: Բայց, այնուամենայնիվ, անձն ունի իր քաղաքական դիրքորոշումը, որն ինձ համար հասկանալի է և առհասարակ քաղաքական մեր մերկ դաշտում նոր գործիչների և նոր քաղաքական ուժերի կայացումը շատ կարևոր է»,-նշեց նա՝ հավելելով, որ քաղաքական դաշտում նոր քաղաքական ուժեր են պետք:
Փոխվարչապետի պաշտոնակատար Տիգրան Ավինյանի օգնական Միքայել Նահապետյանը ֆեյսբուքյան իր էջում գրել էր, որ անցումային կառավարությունը տապալել է ընտրական օրենսգրքի փոփոխության հետ կապված իր հանձնառությունը: «Առկա իրավիճակում պատասխանատվությունը հանրության առաջ չափազանց կարևոր է: Եվ քանի որ այլևս որևէ հնարավորություն չկա կատարելու ստանձնած պարտավորությունը, ինձ այլ բան չի մնում, քան պաշտոնը թողնելը, որպես մեր հռչակած սկզբունքներին լուրջ վերաբերված մարդկանց առաջ պատասխանատվության վերջին միջոց, որպես իմ` այդ կառավարությունում գտնվելու առանցքային նպատակի տապալման գնահատական»,-նշել է նա: