Բյուրականի աստղադիտարանի տնօրենը նոր կառավարությունից գիտության նկատմամբ փոխված վերաբերմունք է ակնկալում
2 րոպեի ընթերցում
ԵՐԵՎԱՆ, 21 ՄԱՅԻՍԻ, ԱՐՄԵՆՊՐԵՍ: ՀՀ ԳԱԱ Վիկտոր Համբարձումյանի անվան Բյուրականի աստղադիտարանի տնօրեն Արեգ Միքայելյանը նոր կառավարությունից մեծ սպասելիքներ ունի:
«Արմենպրես»-ի հաղորդմամբ` լրագրողների հետ զրույցում նա ընդգծեց, որ ակնկալում է, որպեսզի բյուջեից հատկացումները մի փոքր ավելանան, և վերաբերմունքը գիտության նկատմամբ փոխվի:
Միքայելյանն ընդգծեց՝ գիտնականին խոշոր չափերի ֆինանսավորում պետք չէ, բավական է մի փոքր խրախուսանք, և գիտնականը կարող է մեծ արտադրանք տալ:
Նրա խոսքով՝ երկիրը կարող է առաջընթաց ունենալ, եթե գիտությունը զարգացած է:
«Այս կառավարությունը, երևի, ավելի «առաջնահերթ» խնդիրներ ունի լուծելու, թեպետ դեռ հարց է՝ գիտության նկատմամբ վերաբերմունքը առաջնահե՞րթ խնդիրներից պիտի լինի, թե՞ պետք է սպասենք: Նույնիսկ, եթե վերցնենք, որ սոցիալական բազմաթիվ հարցեր կան, որոնք առաջնակարգ են, դրանք լուծելուց հետո անմիջապես պետք է հասկանալ, որ երկիրը կարող է առաջընթաց ունենալ գիտության զարգացման շնորհիվ»,- ասաց աստղադիտարանի տնօրենը:
Բանախոսի պնդմամբ՝ գիտությունն ամենալավ բիզնեսն է:
«Հենց բիզնեսում հնարավոր չէ շատ մեծ տոկոսով շահույթ ակնկալել, այսինքն՝ ներդրված գումարի դիմաց 20-30 տոկոսից ավելի շահույթ հնարավոր չէ ակնկալել, եթե, իհարկե, խաբեություն չկա»,- ասաց Միքայելյանը և իր համոզմունքը հայտնեց, որ այս ոլորտում սահմանափակում չկա, կարելի է որոշակի գումար ներդնել, և ինչ-որ մի հայտնագործություն կարող է հազարապատիկ անգամ ավելի շահույթ ապահովել: