1 րոպեի ընթերցում
ԵՐԵՎԱՆ, 9 ԱՊՐԻԼԻ, ԱՐՄԵՆՊՐԵՍ: Հայաստանի և Եվրոպական միության միջև նոր համաձայնագիրը կողմերի համար սահմանում է ոչ միայն աշխատանքային մեծ օրակարգ, այլ նաև նոր պատասխանատվություն: Ազգային ժողովի արտաքին և եվրաինտեգրման հանձնաժողովների համատեղ նիստում ՀՀ-ԵՄ համաձայնագրի քննարկմանը նման կարծիք հայտնեց ՀՀ ԱԺ եվրաինտեգրման հարցերի մշտական հանձնաժողովի նախագահ Նաիրա Զոհրաբյանը:
«Ես` որպես Հայաստանի Հանրապետության քաղաքացի և Ազգային ժողովի եվրաինտեգրման հարցերի մշտական հանձնաժողովի նախագահ, ցանկանում եմ, որ համաձայնագրով նախատեսված բոլոր բարեփոխումները Հայաստանը իրականացնի ոչ միայն խոսքով, այլ նաև գործով, իսկ դրա համար շատ դեպքերում պետք է խիզախություն, շատ ոլորտներում վիրահատական և կտրուկ փոփոխությունները»,- «Արմենպրես»-ի հաղորդմամբ` ընդգծեց նա:
Նաիրա Զոհրաբյանն ակնկալում է, որ նույնպիսի խիզախություն կունենա նաև Եվրոպական Միությունը իրերը, իրողությունները իրենց անունով կոչելու: Նրա գնահատմամբ` սա որակական նոր փուլ է տեղափոխում Հայաստանի և Եվրոպական Միության հարաբերությունները, որտեղ երկկողմանի պատասխանատվությունը պիտի մեծանա: