Հրանուշ Հակոբյանը բացում է փակագծերը՝ կապված Հայաստանի վարչապետի թեկնածուի հարցի հետ
2 րոպեի ընթերցում
ԵՐԵՎԱՆ, 28 ՄԱՐՏԻ, ԱՐՄԵՆՊՐԵՍ: ՀՀ սփյուռքի նախարար Հրանուշ Հակոբյանը կարծում է, որ հանրապետության նախագահ Սերժ Սարգսյանը Հանրապետական կուսակցության կողմից կառաջադրվի վարչապետի թեկնածու եւ կընտրվի: «Արմենպրես»-ի հաղորդմամբ՝ նա այս մասին հայտարարեց լրագրողների հետ զրույցում՝ ի պատասխան այն դիտարկմանը, թե «Ելք»-ը, մասնավորապես, անընդմեջ հիշեցնում է Սերժ Սարգսյանի՝ տարիներ առաջ արած հայտարարությունը այն մասին, որ նա այլեւս չի առաջադրվելու:
«Կարծում եմ՝ ամեն ինչ իր ժամանակին, տեղին կկատարվի: Ժողովուրդն ընտրություններում իր ձայնը տվել է հանրապետականերին: Ընդհանրապես կյանքը դոգմա չէ, որ այսօր մի բան ասացինք, պետք է անպայման լինի: Կյանքը զարգանում է, փոփոխվում է, խնդիր չեմ տեսնում, դա խոստում չէր: Յուրաքանչյուր պահ ունի իր տրամաբանությունը: Այսօր այս իրավիճակում կարծում եմ՝ հանրապետության նախագահը Հանրապետական կուսակցության կողմից կառաջադրվի վարչապետի թեկնածու եւ կընտրվի: Մարդիկ, երբ քաղաքականության մեջ են գործունեություն ծավալում, նրանք էլ որոշակի փորձ, գիտելիք եւ կապեր ունեն, եւ այդ բոլորը միանգամից մի կողմ դնելը ճիշտ չէ: Մեզ համար ավելի ընդունելի է, որ ինչքան շատ փորձված մարդիկ լինեն ղեկավարության մեջ, այդքան երկիրը կարող է շահել»,-ասաց Հրանուշ Հակոբյանը՝ բերելով Գերմանիայի օրինակը:
Լրագրողների դիտարկմանը, թե Գերմանիայում իրավիճակն այլ է, Հրանուշ Հակոբյանը նշեց, որ Հայաստանում որեւէ հակասահմանադրական քայլ չի արվում: «Ամեն ինչ արվում է Սահմանադրության շրջանակում, օրենքի որեւէ խախտում չկա»,-եզրափակեց նա:
ՀՀ Նախագահ Սերժ Սարգսյանը ապրիլի 9-ին կավարտի պաշտոնավարումը: Հայաստանը կանցնի խորհրդարանական կառավարման համակարգի:Ապրիլի 17-ին ՀՀ Ազգային ժողովը կընտրի նոր վարչապետի: