2 րոպեի ընթերցում
ԵՐԵՎԱՆ, 22 ՀՈՒՆՎԱՐԻ, ԱՐՄԵՆՊՐԵՍ: Ազգային ժողովի «Ելք» խմբակցությունը հանդիպման առաջարկ ստանալու դեպքում անպայման կհանդիպի Հայաստանի Հանրապետության նախագահի ՀՀԿ թեկնածու Արմեն Սարգսյանի հետ: Ազգային ժողովում խորհրդարանական ճեպազրույցների շրջանակներում լրագրողների հետ հանդիպմանն այս մասին հայտնեց «Ելք» խմբակցության պատգամավոր Արարատ Միրզոյանը: «Մենք առաջարկ ստանալու դեպքում անպայման կհանդիպենք լսելու, որոշ հարցեր քննարկելու, ինչու չէ նաև մեր մտահոգությունները հայտնելու համար: Սակայն կարծում եմ, որ դա մեծ հաշվով մեր քվեարկության վրա չի անդրադառնա, որովհետև ինչպես գիտեք՝ մենք փորձել ենք առաջադրել մեր թեկնածուին»,- «Արմենպրես»-ի հաղորդմամբ՝ ընդգծեց Միրզոյանը:
Նա հավելեց, որ իրենք ֆորմալ առումով չկարողացան առաջադրել իրենց թեկնածուին, սակայն շեշտեց, որ, այնուամենայնիվ, պետք է շարունակեն իրենց թեկնածուի վերաբերյալ քարոզչությունը:
Արարատ Միրզոյանը նաև շեշտեց, որ իրենք Արմեն Սարգսյանի հետ հանդիպելու են, սակայն նրա թեկնածությանը դեմ են քվեարկելու:
Հայաստանի Հանրապետական կուսակցությունը ՀՀ նախագահի պաշտոնում առաջադրել է Միացյալ Թագավարությունում ՀՀ դեսպան, ՀՀ նախկին վարչապետ Արմեն Սարգսյանի թեկնածությունը: Արմեն Սարգսյանը ՀՀ Նախագահ Սերժ Սարգսյանից ժամանակ է խնդրել քաղաքական ուժերի, Արցախի ղեկավարության և Սփյուռքի կառույցների հետ հանդիպումներ ունենալու և որոշում կայացնելու համար:
ԱԺ «Ելք» խմբակցությունը հայտարարել էր ՀՀ նախագահի թեկնածուի պաշտոնում Արտակ Զեյնալյանի թեկնածությունն առաջադրելու մտադրության մասին, սակայն մանդատների ոչ բավարար լինելու պատճառով չկարողացավ առաջադրել նրա թեկնածությունը, իսկ «Ծառուկյան» խմբակցությունն այդ հարցում «Ելք»-ին չաջակցեց՝ հայտարարելով, որ չեն ցանկնում մտնել մի գործընթացի մեջ, որում վերջնական արդյունքում պարտվելու են: