Կառավարությունը հավանություն տվեց Հայաստան-ԵՄ բազմավեկտոր համագործակցությունը կանոնակարգող համաձայնագրին
1 րոպեի ընթերցում
ԵՐԵՎԱՆ, 28 ԴԵԿՏԵՄԲԵՐԻ, ԱՐՄԵՆՊՐԵՍ: Կառավարությունը հավանություն տվեց Հայաստանի Հանրապետության` մի կողմից և՛ Եվրոպական միության, և՛ Ատոմային էներգիայի եվրոպական համայնքի ու դրանց անդամ պետությունների, մյուս կողմից՝ համապարփակ և ընդլայնված գործընկերության համաձայնագրին: «Շրջանակային այս համաձայնագիրը նոր գործընկերային մակարդակի է բարձրացնում Հայաստան-Եվրամիություն երկկողմ հարաբերությունները և կոչված է դրանք կարգավորելու գալիք տարիների ընթացքում», - «Արմենպրես»-ի փոխանցմամբ, ասաց ՀՀ ԱԳ նախարար Էդվարդ Նալբանդյանը՝ ավելացնելով, որ համաձայնագրի դրույթները նկատի են առնում ինտեգրացիոն այլ ձևաչափերում Հայաստանի ստանձնած պարտավորությունները։
Ըստ նախարարի՝ համաձայնագիրը կանոնակարգում է Հայաստան-Եվրամիություն քաղաքական երկխոսությունը, տնտեսական և առևտրային հարաբերությունները, ոլորտային համագործակցությունը, կարևորվում ու խրախուսվում է քաղաքական և տնտեսական բարեփոխումների շարունակականության ապահովումը: