1 րոպեի ընթերցում
ԳԱՎԱՌ, 30 ՆՈՅԵՄԲԵՐԻ, ԱՐՄԵՆՊՐԵՍ: Գեղարքունիքի մարզում նոյեմբերի վերջին օրվա գիշերը թեթեւ ձյուն է տեղացել, ինչի հետեւանքով ցուրտ ջերմաստիճանի պայմաններում մերկասառույց է ձեւավորվել միջպետական, հանրապետական, մարզային ու համայնքային նշանակության ճանապարհներին:
Ինչպես «Արմենպրես»-ին տեղեկացրեց Գեղարքունիքի մարզպետարանի աշխատակազմի քաղաքաշինության վարչության տրանսպորտի եւ ճանապարհաշինության բաժնի վարիչ Գեւորգ Խաչատրյանը, ձյան շերտ հիմնականում ձեւավորվել է Սեւանի տարածքում, որտեղ այն հասնում է մինչեւ 5 սանտիմետրի, իսկ մնացած տարածքներում՝ 1-2 սանտիմետրի: «Ճանապարհաշինարարները կատարում են մայրուղիների մաքրման եւ մշակման աշխատանքներ:
Ճանապարհներն, ընդհանուր առմամբ, բաց ու երթեւեկելի են մնում, որեւէ տեղ փակ կամ դժվարանցանելի հատված չկա: Հնարավոր է, որ օրվա ընթացքում արեւոտ եղանակի ազդեցությամբ ճանապարհներն ամբողջովին ազատվեն ձյան կամ մերկասառույցի ծածկույթից»,-հավաստեց Գեւորգ Խաչատրյանը: