Ապագայի լրատվական մարտահրավերներն անհնար է դիմագրավել անցյալի գործիքներով. Արամ Անանյան

ԵՐԵՎԱՆ, 20 ՀՈԿՏԵՄԲԵՐԻ, ԱՐՄԵՆՊՐԵՍ: Լրատվության ոլորտում մրցունակ մնալու համար անհրաժեշտ է համակողմանիորեն հասկանալ ապագան եւ այս առումով ամրապնդել կարողությունները` առաջացող մարտահրավերներին դիմագրավելու համար: Այսօրվա ժամանակակից լրատվությունը վաղուց միայն հումանիտար ճյուղ չէ եւ տեխնոլոգիական զարգացման ընթացքը մեծապես ազդում է վերջինիս գործունեության վրա: «Հայոց պետականությունը` միասնության առանցք» խորագրով լրագրողների 8-րդ համահայկական համաժողովին իր «Լրատվության ապագան: Ժամանակակից լրատվական միտումները` համահայկական տեղեկատվական միասնական ցանցի ձեւավորման համատեքստում» զեկույցի ընթացքում ասաց «Արմենպրես» պետական լրատվական գործակալության տնօրեն Արամ Անանյանը: Նրա խոսքով` լրատվական ապագան շատ կարեւոր է, որպեսզի մենք մեր մրցունակությունը տեսնենք հենց վաղվա օրվա մեջ: «Մենք տեսնում ենք տեխնոլոգիաների էժանացում ողջ աշխարհում, բայց դրան զուգահեռ պիտի սրվի պայքարը հետաքրքիր բովանդակության համար: Հասանելի տեղեկատվության ծավալի աճը չի նշանակում տեղեկատվության սպառման ավելացում»,-ասաց Անանյանը, հավելելով, որ լրագրողները մեկ ոտքով ապագայում են, մյուսով` ներկայում ու անցյալում:

Որպես ամենամեծ եւ ամենալայն միջազգային ընդգրկում ունեցող հայկական գործակալություն, «Արմենպրես»-ն իր գործընկերների հետ քննարկում է ապագայի խնդիրները` հասկանալու, թե որտեղ է լինելու ինդուստրիան 15-20 տարի անց: «Պետք է տեսնել, թե ինչ է լինելու ոչ շատ հեռու ապագայում, ինչպիսի մարտահրավերների հետ ենք բախվելու վաղը: Մենք չենք կարող վաղվա մարտահրավերներին պատասխանել երեկվա գործիքակազմով»,-հավելեց Արամ Անանյանը: Հանրապետության միակ պետական լրատվական գործակալության տնօրենը նկատեց, որ աշխարհում գլոբալ իմաստով ձեւափոխվում են մեդիայի, պետության, բիզնեսի հարաբերությունները, երբ շատ հաճախ ազատ մամուլի ներքո իրականացվում է բիրտ քարոզչություն եւ առաջ են տարվում տեղեկատվության եւ ինֆորմացիայի ժուռնալիստիկայի ազատության հետ կապ չունեցող դրույթներ: «Լրատվամիջոցների թվի շեշտակի աճը չի բերում որակ: Լրագրող չես կարող հավաքել փողոցից: Լրագրողները պետք է որակյալ պրոֆեսիոնալներ լինեն»,-ասաց նա, ուրախալի համարելով այն փաստը, որ հսկայական տեղաշարժ կա պրոֆեսիոնալ լրատվամիջոցների կողմից նրանց հեղինակային իրավունքի պաշտպանության, ինչպես նաեւ համբավի ամրագրման առումով: «Որպես պետական գործակալության ղեկավար, բաց եմ բոլոր տեսակի համագործակցության համար մեր բոլոր գործընկերների հետ»,-զեկույցի վերջում ասաց «Արմենպրես»-ի տնօրենը` համաժողովի մասնակիցներին մաղթելով արգասավոր աշխատանք:

«Հայոց պետականությունը` միասնության առանցք» խորագրով լրագրողների 8-րդ համահայկական համաժողովը մեկնարկեց հոկտեմբերի 20-ին Երեւանում: Համաժողովը կշարունակվի մինչեւ հոկտեմբերի 22-ը: Համաժողովի մասնակիցներն այդ օրը կմեկնեն Արցախ` շարունակելու աշխատանքները: