Առողջապահության նախարարությունը 2015թ-ին իրականացրել է հանրային առողջության ոլորտի գերակայությունների զգալի մասը

ԵՐԵՎԱՆ, 25 ԴԵԿՏԵՄԲԵՐԻ, ԱՐՄԵՆՊՐԵՍ: Առողջապահության նախարարության համար 2015 թվականը առանձնահատուկ տարի էր, քանի որ նախարարությունը գերակայություն սահմանել էր հանրային առողջության ծրագրերի իրականացումը և գործող բուժական ծրագրերի մատչելիության ու որակի ապահովումը: «Արմենպրես»-ի փոխանցմամբ` դեկտեմբերի 25-ին ամփոփիչ ասուլիսին ՀՀ առողջապահության նախարար Արմեն Մուրադյանը տեղեկացրեց, որ հաջողություններ են գրանցվել Առողջապահության համաշխարհային կազմակերպության կողմից Հայաստանում թույլատրված պատվաստանյութերի ներդրման ոլորտում: 2015 թվականին մեկնարկել է զորակոչային և նախազորակոչային տարիքի անձանց պատվաստումների ծրագիրը: «Վերջին տարիներին նոր պատվաստանյութեր են ներդրվել Հայաստանում, ինչի արդյունքում 2.5 անգամ նվազել են մենինգիտների թիվը, 2,5-3 անգամ՝ մինչև հինգ տարեկան երեխաների շրջանում ռոտավիրուսների դեպքերը:Նեմակոկային պատվաստանյութերի արդյունքների գնահատումը կիրականացվի 2016 թվականին»- հայտնեց նախարարը:

Նա առանձնահատուկ կարևորեց սոցիալական մեծ կարևորություն ունեցող Սրտի անհետաձգելի վիրահատության ծրագրի ներդրումը, որի շրջանակում դեկտեմբերի 24-ի դրությամբ բուժօգնություն է ստացել 1485 քաղաքացի, ովքեր ներառված չեն եղել սրտի անվճար վիրահատության իրավունք ունեցող որևէ խմբում։ Կյանքեր փրկող այս ծրագրի շնորհիվ առաջին վեց ամսում 350 դեպքով նվազել է սիրտ-անոթային հիվանդությամբ պայմանավորված մահացության ցուցանիշը: Մինչև տարեվերջ այն պետք է հասնի 1000-ի:

2015թ. դեկտեմբերի 15-ի դրությամբ «CHECK-UP» ծրագրով կանխարգելիչ քննություն է անցել 73,251 շահառու` էլեկտրոնային շտեմարանում հաշվառված շահառուների 90.3 տոկոսը:

«Արդյունավետ են վարակիչ հիվանդությունների կանխարգելման և դրանց դեմ պայքարին ուղղված նպատակային ռազմավարական ծրագրերը։ Իմունականխարգելման ազգային ծրագրի իրականացման արդյունքում մահացության կառուցվածքում վարակիչ հիվանդությունների մասնաբաժինը կազմում է 0.9%: Ձեռքբերումն ուղղակիորեն պայմանավորված է իմունականխարգելման ավելի քան 90% ծածկույթով, ինչպես նաև ՄԻԱՎ/ՁԻԱՀ-ի և տուբերկուլոզի դեմ պայքարի արդյունավետ միջոցառումներով»,- ասաց Մուրադյանը:

Առողջապահության նախարարը կարևորեց նաև 2015թ. մեկնարկած Համաշխարհային բանկի և ՀՀ կառավարության «Հիվանդությունների կանխարգելում և վերահսկում» ծրագրով ոչ վարակիչ հիվանդությունների (դիաբետի, հիպերթենզիայի և արգանդի պարանոցի քաղցկեղի) կանխարգելմանն ու վաղ հայտնաբերմանն ուղղված սկրինինգային համատեղ ծրագիրը` երեք տարվա ընթացքում բնակչության 50-60 տոկոս ընդգրկվածությամբ։ Ըստ նրա՝ հունվար-նոյեմբեր ամիսներին ծրագրի շրջանակում իրականացվել է ավելի քան 500 հազար հետազոտություն։ Լրջագույն ձեռքբերումներից էր դիաբետոնի հասանելիության բարձրացումը, որն այսօր արդեն կազմում է 80 տոկոս, նախորդ տարիների 30-ի փոխարեն: