Շառլ Ազնավուրը «Իմ Փարիզ» նոր մյուզիքլի համար երաժշտություն և բառեր է գրել

ԵՐԵՎԱՆ, 22 ՀՈՒԼԻՍԻ, ԱՐՄԵՆՊՐԵՍ: Ամերիկյան Չեսթեր քաղաքի The Norma Terris Theatre-ը ֆրանսիացի անվանի նկարիչ Անրի դե Տուլուզ-Լոտրեքի կյանքին և ստեղծագործությանն առնչվող նոր մյուզիքլ կներկայացնի, որի երաժշտության և բառերի հեղինակը ֆրանսահայ լեգենդար երգիչ Շառլ Ազնավուրն է: «Արմենպրես»-ի փոխանցմամբ՝ Ազնավուրի պաշտոնական՝ charlesaznavour.com կայքը տեղեկացնում է, որ «Իմ Փարիզ» («My Paris») խորագրով մյուզիքլը պատմություն է մի մեծ արվեստագետի մասին, որը սիրում էր աշխարհը, և այդ սերը փոխադարձ չէր:

Մյուզիքլի հիմքում «Օսկար»-ի, «Թոնի»-ի և Պուլիտցերյան մրցանակների դափնեկիր Ալֆրեդ Ուրիի գիրքն է: «Թոնի»-ի մրցանակակիր, խորեոգրաֆ Քեթլին Մարշալը կյանքի է կոչել այս ամենը: goodspeed.org-ն էլ տեղեկացնում է, որ ներկայացումը կցուցադրվի հուլիսի 23-ից օգոստոսի 16-ը: