Արամ Ա-ն ընդունել շվեյցարացի միսիոներ Յակոբ Կունցլերի թոռնուհուն
2 րոպեի ընթերցում
![Արամ Ա-ն ընդունել շվեյցարացի միսիոներ Յակոբ Կունցլերի թոռնուհուն](http://armenpress.am/resized/480/static/news/b/2015/07/812326.jpg)
ԵՐԵՎԱՆ, 16 ՀՈՒԼԻՍԻ, ԱՐՄԵՆՊՐԵՍ: Ն.Ս.Օ.Տ.Տ Արամ Ա Վեհափառ Հայրապետին այցելել են Ղազիրի որբանոցի տնօրեն Իդա Ալամեդդին, ով Պապա Կունցլերի (շվեյցարացի միսիոներ Յակոբ Կունցլեր) թոռնուհին է, ու երկու որդիները՝ Քարիմ և Աբբուդ Դիաբները: Նրանց ընկերակցել է «Թռչնոց բույն»-ի խնամալակության ատենապետ Սեդա Խտշյանը և թանգարանների արխիվներով զբաղվող Կարո Տերունյանը: Այս մասին «Արմենպրես»-ը տեղեկացավ Կիլիկիո կաթողիկոսության պաշտոնական կայքից:
Հանդիպման ընթացքում արծարծվել են զանազան թեմաներ՝ կապված Պապա Կունցլերի կյանքի, որբերի խնամատարական աշխատանքներին նրա դերակատարության հետ, որոնցից են զանազան ծրագրերի կազմակերպումը գորգագործության գործարանում, աղջիկների համար ձեռագործի գործարանի բացումը և Ազունիեի թոքային հիվանդանոցի հիմնումը:
Պապա Կունցլերը խնամել է ավելի քան 8 հազար որբերի և նրանց հայրն է դարձել:
Վեհափառ Հայրապետը հյուրերին հայտնել է, թե ինքն անձամբ ներկա կգտնվի սեպտեմբերին Շվեյցարիայում «ԱՐՄԵՆՕՖԱՍ»-ի կողմից կազմակերպվելիք Հայոց ցեղասպանության 100-րդ տարելիցի առիթով Պապա Կունցլերին նվիրված հատուկ հանդիսությանը:
Ալամադդինը նշել է, որ ինքը նույնպես կմասնակցի վերոնշյալ միջոցառմանը:
Նաև խոսք է գնացել Պապա Կունցլերի գերեզմանը նորոգելու անհրաժեշտության մասին և արժևորելու նրա տեղն ու դերը Հայոց ցեղասպանությունից ճողոպրած որբերի փրկարար գործում:
Ապա հյուրերը այցելել են Ջաբեյլի Հայոց ցեղասպանության որբերի նորակառույց թանգարան: