2 րոպեի ընթերցում
ԵՐԵՎԱՆ, 18 ՀՈՒՆԻՍԻ, ԱՐՄԵՆՊՐԵՍ: Գյումրու կենտրոնում կտեղադրվի քաղաքի պատմական կենտրոնի նախագծման, վերականգման և արխիվացման կենտրոնի հիմնաքարը: «Գյումրու ընկերներ» հիմնադրամի կողմից իրականացվող նախագծի մասին հունիսի 18-ին, «Արմենպրես»-ի հաղորդմամբ, տեղեկացրեց Գյումրիում Իտալիայի պատվո հյուպատոս Անտոնիո Մոնտալտոն:
«Կենտրոնը կտեղակայվի պատմամշակութային արժեք ունեցող շենքում, որտեղ վերականգնումից հետո կգործի Գյումրու պատմամշակությային կենտրոնի և ճարտարապետական վերականգման կենտրոն: Այդտեղ կկատարվեն արխիվացման, փաստագրման և նախագծման աշխատանքներ: Գյումրու իշխանությունների հետ համատեղ ստեղծվող կենտրոնը հնարավորություն կտա արտասահմանյան և հայաստանցի ճարտարապետներին համատեղ կազմել Գյումրու պատպամշակութային կենտրոնի վերականգման ծրագիրը», - տեղեկացրեց Անտոնիո Մոնտալտոն:
Գյումրիում Իտալիայի պատվո հյուպատոսը տեղեկացրեց, որ կենտրոնի բացումն ակնկալում է կատարել 2016թ. հունիսի, որտեղ նաև կենտրոնանալու է Գյուրջիևյան կենտրոնը, քանի որ ծնունդով այս գյումրեցին աշխարհում ունի մեծ համբավ և կենտրոնը կարող է դառնալ զբոսաշրջիկների այցելության մեկ վայր ևս:
Կենտրոնը կտեղակայվի Գյումրի քաղաքի համայնքի սեփականություն հանդիսացող Շիրազի 30 հասցեում գտնվող շենքում, որը նախկինում հանդիսանում էր Դրամփյանների առանձնատունը: Այն 30 տարի ժամկետով անհատույց հանձնվում է «Գյումրու ընկերներ» հիմնադրամին՝ նորոգման, վերականգման և օգտագործման համար: