Գեղարքունիքում հունիսմեկյան միջոցառումները կազմակերպեցին «Վորլդ Վիժն Հայաստան»-ը եւ Գավառի քաղաքապետարանը
2 րոպեի ընթերցում
ԳԱՎԱՌ, 1 ՀՈՒՆԻՍԻ, ԱՐՄԵՆՊՐԵՍ: Գեղարքունիքի մարզի քաղաքային համայնքներում հունիսի 1-ին տոնականորեն նշվեց Երեխաների պաշտպանության միջազգային օրը: Ինչպես «Արմենպրես»-ին տեղեկացրեց Գեղարքունիքի մարզետարանի աշխատակազմի կրթության, մշակույթի եւ սպորտի վարչության, մշակույթի եւ սպորտի բաժնի վարիչ Գեղամ Չարվադարյանը, երեխաների տոնը հիմնականում նշվում է մարզի քաղաքային հինգ ու գյուղական մի շարք խոշոր համայնքներում: Միջոցառումներն ընթանում են նախօրոք նախապատրաստած ընթացակարգով` կավճանկարչություն, համայնքի ստեղծագործական ուժերով կազմակերպված համերգային ծրագրեր, էքսկուրսիաներ:
Գավառի քաղաքապետարանի մամուլի քարտուղար Ալվարդ Մանուկյանի հավաստմամբ` «Վորլդ Վիժն Հայաստան»-ի Գավառի ՏԶԾ-ի եւ Գավառի քաղաքապետարանի համատեղ ջանքերով Երեխաների իրավունքների պաշտպանության օրվա առթիվ քաղաքի Ազատության փողոցի զբոսայգում կազմակերպվել էր տոնական միջոցառում: Միջոցառման մասնակից փոքրիկներին այցելել են հեքիաթների եւ մուլտֆիլմերի հերոսներ, որոնց հետ նրանք երգել են, պարել, խաղացել եւ զվարճացել: Փոքրիկներին իրենց տոնի առթիվ գեղարվեստական կատարումներով ողջունել են Գավառի արվեստի եւ երաժշտական դպրոցների սաները: Երեխաները մասնակցել են նաեւ բացօթյա նկարչության, իսկ զբոսայգին մանուկների համար դարձել էր նաեւ կավճանկարչության հարթակ:
«Վորլդ Վիժն Հայաստան» կազմակերպության Գավառի ՏԶԾ գրասենյակը մարզկենտրոնի զբոսայգում էր հավաքել նաեւ Գավառի տարածաշրջանի շրջակա գյուղերի մանկապարտեզների երեխաներին:
Խոսրով Խլղաթյան