1 րոպեի ընթերցում
ԳԱՎԱՌ, 26 ՄԱՅԻՍԻ, ԱՐՄԵՆՊՐԵՍ: Գեղարքունիքի մարզի Գանձակ գյուղում մայիսի 25-ի դրությամբ ավարտվել է գարնանացանը:
Ինչպես «Արմենպրես»-ին տեղեկացրեց Գանձակի գյուղապետ Վանիկ Հարությունյանը, այս տարի մշակվել է գյուղի վարելահողերի ավելի քան 90 տոկոսը:»Գանձակում այս տարի կատարվել է 1000 հեկտար ցանք, որից 700 հեկտարը զբաղեցնում են գարնանացան գարու, 200 հեկտարը` կարտոֆիլի եւ մոտ 100 հեկտարը` աշնանացան ցորենի ցանքերը: Մոտ 50 հեկտար զբաղեցնում են բազմամյա խոտաբույսերը: Չմշակված են մնում միայն բարձրադիր գոտու որոշ վարելահողեր, որոնց մշակությունը նվազ եկամտաբեր է»,-նշեց համայնքի ղեկավարը:
Վարելահողերի նման ծավալի մշակման հետ մեկտեղ Գանձակում ավելացել է նաեւ անասնագլխաքանակը: Նույն աղբյուրի համաձայն` Գանձակում 2015 թվականի մայիսին հաշվառվել է 2000 գլուխ խոշոր եղջերավոր անասուն, որի ուղիղ կեսը կթու կովեր են: Նախորդ տարվա համեմատ Գանձակում խոշորի գլխաքանակն ավելացել է 130-ով:
ԽոսրովԽլղաթյան