Գեղարքունիքի մարզում կատարվել է 17 հազար հեկտար հացահատիկի եւ 9 հազար հեկտար կարտոֆիլի ցանք
2 րոպեի ընթերցում
ԳԱՎԱՌ, 23 ՄԱՅԻՍԻ, ԱՐՄԵՆՊՐԵՍ: Գեղարքունիքի մարզի տնտեսություններում մայիսի երկրորդ կեսից հետո լայն թափով ընթանում են գարնանացանի աշխատանքները: Ինչպես տեղեկացրեց Գեղարքունիքի մարզպետարանի աշխատակազմի գյուղատնտեսության եւ բնապահպանության վարչության պետ Վանիկ Հովհաննիսյանը, մայիսի 23-ի դրությամբ մարզի համայնքներում արդեն կատարվել է մոտ 17 հազար հեկտար գարնանացան գարու, 500 հեկտար գարնանացան ցորենի, 9 հազար հեկտար կարտոֆիլի ցանք: «Այս տարի բերքի տակ կունենանք մոտ 75 հազար հեկտար ցանքատարածություններ, եւ եթե արտակարգ պատահարներ չլինեն, սպասում ենք նաեւ բերքառատ տարի՝ նախորդ գյուղատնտեսական տարվա բարձր ցուցանիշները պահպանելու եւ ավելացնելու ակնկալիքով»,-նշեց Վանիկ Հոնհաննիսյանը:
Գարնանացան գարու ցանքերը կկազմեն մինչեւ 21 հազար, գարնանացան ցորենի ցանքերը՝ 1300, կարտոֆիլի ցանքերը՝ 15 հազար հեկտար: Բանջարբոստանային մյուս մշակաբույսերի ցանքերը կկազմեն մոտ 3 հազար հեկտար: Կերային մշակաբույսերի ցանքն արդեն ավարտված է: Տնտեսությունները հիմնականում ապահովված են սերմացուներով, դիզվառելիքով, պարարտանյութերով, վարող ու ցանող մեխանիզմների մատչելի ծառայությունների մատուցմամբ: Եղանակային բարենպաստ պայմանների դեպքում գարնանացանը Գեղարքունիքում կավարտվի հունիսի առաջին տասնօրյակի ընթացքում:
ԽոսրովԽլղաթյան