Երևանի Հաղթանակ թաղամասում «Օպել Աստրա»-ն բախվել է գազատարին և շրջվել

ԵՐԵՎԱՆ, 26 ՄԱՐՏԻ, ԱՐՄԵՆՊՐԵՍ: ՀՀ տարածքային կառավարման և արտակարգ իրավիճակների նախարարությունում մարտի 25-ին` ժամը 23.41-ին, ահազանգ է ստացվել, որ Երևանի Հաղթանակ թաղամասի 1-ին փողոցի սկզբնամասում «Օպել» մակնիշի ավտոմեքենան բախվել է գազատար խողովակին, առկա է գազի արտահոսք. անհրաժեշտ է փրկարարների օգնությունը: Ինչպես «Արմենպրես»-ին տեղեկացրին ՀՀ տարածքային կառավարման և արտակարգ իրավիճակների նախարարությունից, դեպքի վայր է մեկնել մեկ մարտական հաշվարկ:

Պարզվել է, որ 1-ին փողոցի թիվ 22 տան մոտակայքում «Օպել Աստրա» մակնիշի 1603GT պետհամարանիշի ավտոմեքենան բախվել է ճամփեզրի գազատար խողովակին, դուրս եկել ճանապարհի երթևեկելի հատվածից և շրջվել, տուժածներ չկան: Հրշեջ-փրկարարներն ուղղել են ավտոմեքենան և ամրացրել գազատար խողովակը: Գազի վթարային ծառայության աշխատակիցները դադարեցրել են արտահոսքը: