Ն.Ս.Օ.Տ.Տ Գարեգին Բ Ամենայն Հայոց կաթողիկոսի օրհնությամբ բացվեց Գյումրու Հայորդաց տունը

ԳՅՈՒՄՐԻ, 4 ԴԵԿՏԵՄԲԵՐԻ, ԱՐՄԵՆՊՐԵՍ (սեփ.թղթ.Արմենուհի Մխոյան): Գյումրիում դեկտեմբերի 4-ին մեծ հանդիսությամբ ու Ն.Ս.Օ.Տ.Տ Գարեգին Բ Ամենայն Հայոց Կաթողիկոսի օրհնությամբ ու ձեռամբ բացվեց Մայր Աթոռ Սուրբ Էջմիածնի և Հայկական բարեգործական ընդհանուր միության /ՀԲԸՄ/ Գյումրու Հայորդաց տունը: Մինչ Հայորդաց տան հանդիսավոր բացման համերգային ծրագրի մեկնարկը Ամենայն Հայոց կաթողիկոսն անձամբ շրջեց կենտրոնի բոլոր դասասենյակներով, ծանոթացավ կատարված աշխատանքներին և հետագա ծրագրերին:

Այս պահին արդեն Հայորդաց տունն ունի մոտ 300 սան և 10 խմբակ, սակայն, ինչպես «Արմենպրես»-ին տեղեկացրեց Մայր Աթոռ Սուրբ Էջմիածնի և ՀԲԸՄ Հայորդաց տների գրասենյակի տեսուչ Տեր Կոմիտաս վարդապետ Հովնանյանը, և՛ սաների և՛ խմբակների թիվն աճելու միտում ունի: «Ինձ համար կարևոր չէ, թե ինչքան գումար է ծախսվել, թեև դա բավական մեծ գումար է, այլ կարևոր է այն, որ այս կառույցը բացվում է վիրավոր Գյումրիում և այն, որ մանուկները դասերից հետո կարող են գալ այստեղ և ձևավորվել որպես հայ մարդ: Այստեղ անգնահատելի է ամերիկահայ բարերար, Հայաստանում չծնված ու չմեծացած Սանդրա Լայթներ-Շահինյանի բարեգործությունը, ով իր ծնողների՝ Վաղինակ ու Շուշանիկ Շահինյանների հիշատակին բացեց իր գանձանակն ու նվիրաբերեց այնքան գումար, որքան պահանջվում էր Գյումրիին ու գյումրեցիներին աջակցելու համար»,- նշեց Տեր Կոմիտաս վարդապետ Հովնանյանը:

Որպես Գյումրու «Հայորդաց տան» կառույց ծառայում է նախկին «Սպայի տուն»-ը: Շինարարական աշխատանքերը մեկնարկել էին 2000 թվականին:

«Անշուշտ, մեր հոգին ուրախ է, ու փառք ենք տալիս Աստծուն, որ վերջապես այս Հայորդաց տունն իր դռները բացեց մեր մատաղ սերնդի առջև, ովքեր այս հաստատության ներքո պետք է գան իրենց ձիրքը, տաղանդն ու շնորհները զորացնեն ու բացահայտեն: Տեսանք, թե որքան ուրախ են երեխաները, ու իրենց դեմքերի ժպիտը փոխանցվեց նաև մեզ: Վստահ ենք, որ յուրաքանչյուր գյումրեցի մուտք գործելով այս հաստատություն, պետք է ցնծություն ապրի, մենք էլ պետք է շարունակենք մեր խնամքի ու հոգածության մեջ պահել այս հաստատությունը և անհրաժեշտ բոլոր պարագաններն ապահովել իրենց ուսման ու աշխատանքի համար»,- լրագրողների հետ ունեցած հանդիպման ժամանակ նշեց Ն.Ս.Օ.Տ.Տ Գարեգին Բ Ամենայն Հայոց կաթողիկոսը:

Մայր Աթոռ Սուրբ Էջմիածնի և Հայկական բարեգործական ընդհանուր միության Գյումրու Հայորդաց տան բացման արարողության համերգային ծրագրի ընթացքում ելույթ ունեցան հայորդաց տան խմբակների սաները, Գյումրու սիմֆոնիկ և ժողովրդական գործիքների պետական նվագախմբերը: Վեհափառ Հայրապետին ողջունեցին և շնորհակալական խոսք հայտնեցին Շիրակի մարզպետ Ֆելիքս Ցոլակյանն ու Գյումրու քաղաքապետ Սամվել Բալասանյանը: Մարզային և քաղաքային իշխանությունների ղեկավարները խոստացան՝ այսուհետ լինել նորաբաց կենտրոնի կողքին և աջակցել Հայորդաց տանը: Ն.Ս.Օ.Տ.Տ Գարեգին Բ Ամենայն Հայոց կաթողիկոսին իր շնորհակալական խոսքը հղեց նաև Շիրակի թեմի առաջնորդ Միքայել եպիսկոպոս Աջապահյանը:

«Ավելորդ է ասել, թե ինչպիսի ուրախություն ենք այսօր ապրում: Սա տարիների երազանք է: Վեհափառ Հայրապետը դեռ իր Արարատյան թեմի Առաջնորդական փոխանորդ լինելու ժամանակվանից, նախաձեռնեց Հայորդաց տների ցանցի ստեղծումը Հայկական բարեգործական ընդհանուր միության աջակցությամբ և այդ ցանցը տարածել, և երբ 2000 թվականին, Ամենայն Հայոց Կաթողիկոս ընտրվելուց մի քանի ամիս անց այցելելով Շիրակի թեմ, Կաթողիկոսը եղավ «Պիոներների պալատում» և տեսավ տնակային վատ պայմանները, Ամենայն Հայոց կաթողիկոսի մոտ ցանկություն առաջացավ Գյումրիում ևս տեսնել Հայորդաց տուն՝ լուսավոր պայմաններով, ինչին արժանի է գյումրեցի մանուկը: Այդ նպատակի համար ընտրվեց այս կառույցը՝ ռուսական զորակայանի նախկին «Սպայի տուն»-ը, որն աննկարագրելի վատ վիճակում էր: Բավական երկար ու դժվարին գործընթաց անցանք մինչ ռուսական զորակայանն այս շենքը հանձնեց ՀՀ պաշտպանության նախարարությանը, իսկ այն սիրահոժար նվիրեց Հայ Առաքելական Եկեղեցու Մայր Աթոռ Սուրբ Էջմիածնին, և դրանից հետո կաթողիկոսը գտավ բարերարին, ով պատրաստակամ եղավ հոգալու այս շենքի վերակառուցման ծախսը: Աշխատանքերը երկար տևեցին, քանի որ Վեհափառ Հայրապետն այդ աշխատանքերին հետևեց իր շեշտված բծախնդրությամբ, ամեն մի սանտիմետրը ստուգելով: Անշուշտ, շնորհակալ ենք բոլոր նրանց, ովքեր մասնակցել են այս գործընթացին, բայց նախ և առաջ Վեհափառ Հայարպետին, ում մտահաղացումն է եղել սա»,- նշեց Շիրակի թեմի առաջնորդ գերաշնորհ Միքայել եպիսկոպոս Աջապահյանը՝ վստահեցնելով, որ ի տարբերություն Հայաստանում գործող մյուս Հայորդաց տների՝ Գյումրու Հայորդաց տունը կառանձնանա: «Սա նշանակում է, որ մյուս «Հայորդաց տներ»-ն այսուհետ պետք է «զգուշանան»: Սա լինելու է լավագույնը և լինելու է Գյումրուն հատուկ բարձր մակարդակի վրա: Ես նախապես հպարտանում եմ այն փաստով, որ 15-20 տարի անց այս Հայորդաց տան շրջանավարտերից շատերը համալրելու են հայտնի արվեստագետների ու մարզիկների շարքերը»,- ավելացրեց Շիրակի թեմի առաջնորդը:

Միջոցառումն ավարտվեց Վեհափառ Հայրապետի օրհնության խոսքով: