Հայաստանի դիվանագետները ջանք չեն խնայում խաղաղությունը հարատև դարձնելու համար. ԱԳ նախարար

ԵՐԵՎԱՆ, 12 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ արտգործնախարար Էդվարդ Նալբանդյանը սեպտեմբերի 11-ին այցելել է Վայոց ձորի մարզ։ Եղեգնաձորում նախարար Նալբանդյանը հանդիպում է ունեցել մարզի ակտիվի՝ համայնքների ղեկավարների, մարզպետարանի ղեկավար աշխատակիցների, կրթական հաստատությունների տնօրենների, Տնտեսագիտական համալսարանի Եղեգնաձորի մասնաճյուղի դասախոսների և ուսանողների հետ։ Ինչպես «Արմենպրես»-ին տեղեկացրին ՀՀ արտգործնախարարության մամուլի, տեղեկատվության եւ հասարակայնության հետ կապի վարչությունից, պատասխանելով ներկաների հարցերին` Էդվարդ Նալբանդյանը հանգամանալից ներկայացրել է Հայաստանի արտաքին քաղաքականության առաջնահերթությունները։ Արտաքին քաղաքական գերատեսչության ղեկավարը մանրամասնորեն անդրադարձել է Հայաստանի և ԵԱՀԿ Մինսկի խմբի համանախագահ երկրների ջանքերին` ղարաբաղյան հիմնախնդրի խաղաղ կարգավորման ուղղությամբ։

Արտգործնախարարը խոսել է Եվրասիական տնտեսական միության հիմնադրման մասին պայմանագրին Հայաստանի միացման գործընթացից։ Նախարար Նալբանդյանը պատմել է հարևան երկների հետ հարաբերությունների մասին, անդրադարձել Հայաստան-Եվրոպական միություն համագործակցությանը։

Այնուհետև Հայաստանի արտաքին քաղաքական գերատեսչության ղեկավարը` Վայոց ձորի մարզպետ Էդգար Ղազարյանի, ՀՀ պաշտպանության նախարարության չորրորդ բանակային կորպուսի հրամանատար Անդրանիկ Մակարյանի ուղեկցությամբ այցելել է մարզում գտնվող պաշտպանական դիրքեր, զրուցել Հայրենիքի սահմաները պաշտպանող զինվորների հետ, ծանոթացել հերթապահություն իրականացնող զինվորների ծառայության պայմաններին, սահմանագծում տիրող իրավիճակին։

Նախարար Նալբանդյանը, զինվորներին մաղթելով բարի ծառայություն և հաջողություններ, ասել է. «Կարևոր է, որ դուք այնպես ծառայեք, որ ձեր ընտանիքներում հպարտանան իրենց զավակներով և ուրախանան բանակից ստացվող լուրերով։ Համոզված եղեք, Հայաստանի դիվանագետները ջանք չեն խնայում խաղաղությունը հարատև դարձնելու համար»։