Սիրիայի Հոմս քաղաքում ականապատ մեքենա է պայթել

ԵՐԵՎԱՆ, 12 ՀՈւՆԻՍԻ, ԱՐՄԵՆՊՐԵՍ: Սիրիական Հոմս քաղաքում հունիսի 12-ին պայթյուն է որոտացել: Ինչպես հաղորդում է «Արմենպրես»-ը, վկայակոչելով սիրիական ՍԱՆԱ գործակալությունը, ականապատ մեքենան պայթել է Ուադի Զահաբ թաղամասի Ալ Ահրամ փողոցում: Ոստիկանությունը տեղեկացնում է, որ պայթյունի հետևանքով զոհվել է 7 և վիրավորվել` 55 մարդ: Նրանց թվում կան կանայք և երեխաներ: Ավելի վաղ հայտարարվել էր 25 վիրավորների մասին:

Մյուս կողմից, ընդդիմադիր աղբյուրները տեղեկացնում են, որ մեկ այլ ուժգին պայթյուն է որոտացել Հոմս քաղաքում, որի հետևանքով 4 մարդ է զոհվել: Տեղանքը նյութական վնասներ է կրել:

Նախագահականն ընտրություններից հետո սա առաջին ահաբեկչությունն է:

Ավելի վաղ` մայիսի 10-ին, Հոմս քաղաքն ազատագրվել էր զինյալներից և բնակիչները վերադարձել էին իրենց բնակավայրեր: