1 րոպեի ընթերցում
ԵՐԵՎԱՆ, 27 ՄԱՐՏԻ, ԱՐՄԵՆՊՐԵՍ: Սիրիական տարածքից մարտի 27-ին արձակված ռումբեր են ընկել Լիբանանի սահմանամերձ Արսալ քաղաքում: Ինչպես հաղորդում է «Արմենպրես»-ը, վկայակոչելով Լիբանանի ազգային տեղեկատվական գործակալությունը, հուժկու պայթյունների ձայները լսելի են եղել շատ հեռվից: Պայթյուններից 5 մարդ վիրավորվել է:
Սիրիական ռազմական օդանավերը վերջին 10 օրերի ընթացքում զինված ընդդիմադիրներին հետապնդելու շրջանակներում ռմբակոծել են Լիբանանի սահմանային շրջանները, մասնավորապես, Արսալ քաղաքը: Ընդհանուր առմամբ, ռմբակոծության հետևանքով 25 մարդ է վիրավորվել:
Բացի այդ, տեղեկություններ են ստացվել, որ մարտի 27-ի առավոտյան Լիբանանի հյուսիսային Տրիպոլի քաղաքում անհայտ զինյալների արձակած գնդակից լիբանանցի զինվոր է զոհվել: Իսկ նախօրեին Տրիպոլիում սուննիների և ալաուիների միջև տեղի ունեցած բախումների հետևանքով 3 մարդ է զոհվել, այդ թվում՝ մեկ երեխա:
Սիրիական հակամարտության ընթացքում Տրիպոլի քաղաքում բախումներ են տեղի ունենում Սիրիայի նախագահ Բաշար ալ Ասադի կողմնակիցների և ընդդիմադիրների միջև, որոնց հետևաքով հարյուրավոր մարդիկ են զոհվել և վիրավորվել: