Ադրբեջանի ռազմական «ագիտպրոպը» փորձում է ներկայացնել այն, ինչը պետք է խոստովաներ օրեր առաջ. ԼՂՀ ՊՆ

ՍՏԵՓԱՆԱԿԵՐՏ, 23 ՀՈՒՆՎԱՐԻ, ԱՐՄԵՆՊՐԵՍ: Ադրբեջանական քարոզչամեքենայի կողմից տարածված տեղեկատվությունը, իբր հունվարի 23-ին հակամարտ զորքերի շփման գծի հյուսիսարևելյան ուղղությամբ արձանագրված հրադադարի խախտման արդյունքում հայկական կողմի կրակոցից զոհվել է ադրբեջանական բանակի կապիտան Էլնուր Ջաֆարովը, իրականությանը չի համապատասխանում: Ինչպես «Արմենպրես»-ին տեղեկացրին ԼՂՀ ՊՆ մամուլի ծառայությունից, ՊԲ առաջապահ ստորաբաժանումները շարունակում են պահպանել հրադադարի ռեժիմը, և միայն պատասխան քայլերի են դիմում խիստ անհրաժեշտության դեպքում: «Ինչ վերաբերում է ադրբեջանական բանակում արձանագրված վերոնշյալ կորստին, ապա հարևան, բայց ոչ բարեկամ երկրում կատարվածը, ամենայն հավանականությամբ, պետք է դիտարկել ոչ թե հրադադարի ռեժիմի խախտման, այլև հունվարի 19-ի լույս 20-ի գիշերը Մարտակերտի պաշտպանական ուղղությամբ ադրբեջանական դիվերսանտների կողմից ձեռնարկված նախահարձակ գործողության համատեքստում: Հարկ ենք համարում հիշեցնել, որ միայն հունվարի 20-23-ն ընկած ժամանակահատվածում Բաքվի լրատվամիջոցների հաղորդմամբ, ադրբեջանական բանակում (իբր տարբեր հանգամանքներում) արձանագրվել է մահվան 2 և վիրավորման 6 դեպք… Իսկ այս ամենից արվելի հետևությունը, թերևս, մեկն է` Ադրբեջանի ռազմական «ագիտպրոպը» նրբանկատորեն փորձում է ներկայացնել այն, ինչի մասին պետք է խոստովաներ օրեր առաջ…»,-ասված է ԼՂՀ ՊՆ մամուլի ծառայության հայտարարության մեջ:

Ադրբեջանի լրատվամիջոցների փոխանցմամբ` այդ երկրի պաշտպանության նախարարությունը հաստատել է, որ զոհվել է ադրբեջանական բանակի կապիտան Էլնուր Ջաֆարովը: