Մոսկվան չի կարող անտեսել Հայաստանի շահերը Ադրբեջանի հետ կապված ցանկացած քայլ իրականացնելիս. ռուս փորձագետ
2 րոպեի ընթերցում
ԵՐԵՎԱՆ, 14 ՕԳՈՍՏՈՍԻ, ԱՐՄԵՆՊՐԵՍ: Ռուսաստանը շահագրգրված է Հարավային Կովկասում որոշակի հավասարակշռություն պահպանելու գործում, եւ այդ պատճառով անհրաժեշտ է զարգացնել հարաբերություններն ինչպես Հայաստանի, այնպես էլ Ադրբեջանի հետ: Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոսի»-ն, այսպիսի կարծիք է հայտնել ռուս քաղաքական փորձագետ Անդրեյ Կազանցեւը: «Այդպիսով Ռուսաստանը հնարավորություն կունենա վերահսկողության տակ պահել իր հարավային սահմաններում տիրող իրավիճակը»,- ասել է նա:
Սակայն, փորձագետների կարծիքով՝ Ռուսաստանի համար այնքան էլ հեշտ չի լինի անել դա: «Հայաստանը Ռուսաստանի պաշտոնական դաշնակիցն է, նրանք միասին Հավաքական անվտանգության պայմանագրի կազմակերպության անդամ են, իսկ Բաքուն այս ամենը շատ հիվանդագին է ընդունում»,- ասել է միջազգային քաղաքականության հարցերով փորձագետ Անդրեյ Սուզդալցեւը:
Փորձագետների կարծիքով՝ Լեռնային Ղարաբաղի շուրջ ստեղծված լարված իրավիճակը կարող է շատ ավելի տհաճ ընթացք ստանալ: Անդրեյ Կազանցեւը նշել է, թե պատահական չէ, որ Ադրբեջանը մեծ քանակությամբ զենք գնում ոչ միայն Ռուսաստանից, այլ ամբողջ աշխարհից: «Նման իրավիճակում շատ կարեւոր է, որպեսզի միջնորդ երկրները, այդ թվում եւ Ռուսաստանը, քայլեր ձեռնարկեն տարածաշրջանում լարվածությունը թուլացնելու ուղղությամբ»,- ասել է նա:
Ռուսաստանի գիտությունների ակադեմիայի միջազգային տնտեսագիտության եւ միջազգային հարաբերությունների ինստիտուտի ավագ գիտաշխատող Վիկտոր Նադեին-Ռաեւսկին էլ նշել է, որ Ադրբեջանի հետ կապված ցանկացած գործողություն իրականացնելիս՝ Մոսկվան չի կարող անտեսել Հայաստանի շահերը: