2 րոպեի ընթերցում
ԵՐԵՎԱՆ, 18 ՄԱՐՏԻ, ԱՐՄԵՆՊՐԵՍ: Աշխարհի 180 պետությունների ղեկավարներ կամ բարձրաստիճան պատվիրակություններ են ժամանելու Հռոմի Ֆրանցիսկոս պապի գահակալման արարողությանը, որը մարտի 19-ին տեղի կունենա Վատիկանում, երբ կաթոլիկ եկեղեցին տոնում է Սուրբ Հովսեփի օրը: Այդ մասին, ինչպես տեղեկացնում է «Արմենպրես»-ը, հաղորդել է KAI գործակալությունը՝ հղում անելով տարբեր երկրների պաշտոնական աղբյուրների:
Վատիկանում կայանալիք արարողությանն իրենց մասնակցության մասին հայտարարել են Մեծ Բրիտանիայի գահաժառանգ արքայազն Չարլզը, Իսպանիայի Սոֆյա թագուհին եւ գահաժառանգ արքայազն Ֆելիպեն, ինչպես նաեւ Բելգիայի թագավորական զույգը՝ Ալբերտ Երկրորդը եւ Պաոլան:
ԱՄՆ-ն ներկայացնելու է երկրի փոխնախագահ Ջո Բայդենը, Արգենտինան՝ նախագահ Կրիստինա Ֆեռնանդես դե Կիրշները, Բրազիլիան՝ նախագահ Դիլմա Ռուսեֆը, Մեքսիկան՝ նախագահ Էնրիկե Պենյա Նիետոն: Իրենց ներկայությունն արդեն հաստատել են Գերմանիայի նախագահ Յոահին Գաուկը եւ կանցլեր Անգելա Մերկելը, Ավստրիայի նախագահ Հայնց Ֆիշերը եւ Լեհաստանի նախագահ Բրոնիսլավ Կոմորովսկին: Առայժմ հայտնի չէ՝ Վատիկան կժամանի արդյոք Ֆրանսիայի նախագահ Ֆրանսուա Օլանդը, թե երկիրը կներկայացնի վարչապետ Ժան Մարկ Էյրոն:
Հռոմի պապի գահակալման արարողությանը Ռուսաստանի Դաշնությունը ներկայացնելու է Պետդումայի խոսնակ Սերգեյ Նարիշկինը:
Սուրբ աթոռը դիվանագիտական հարաբերություններ է պահպանում աշխարհի 179 երկրների հետ: