2 րոպեի ընթերցում
ԵՐԵՎԱՆ, 18 ԴԵԿՏԵՄԲԵՐԻ, ԱՐՄԵՆՊՐԵՍ: Սիրիայի ընդդիմադիր աղբյուրները տեղեկացնում են, որ ընդդիմադիր ուժերը հսկողություն են հաստատել Դամասկոսի մոտակայքում գտնվող Յարմուք շրջանում, որտեղ պաղեստինցի գաղթականների ճամբարն է: Ինչպես հաղորդում է «Արմենպրես»-ը` վկայակոչելով արաբական լրատվամիջոցները, մի քանի օր շարունակ արյունալի բախումներ են տեղի ունեցել կառավարական ուժերի եւ ընդդիմադիր զինյալների միջեւ, որից հետո զինյալները հայտարարել են, որ ճամբարն ամբողջությամբ Սիրիայի ազատ բանակի հսկողության տակ է, եւ այժմ բախումները դադարել են:
Սիրիական աղբյուներն իրենց հերթին տեղեկացնում են, որ բանակը շրջապատել է ճամբարի մուտքը, ինչպես նաեւ արեւելյան կողմը Թադամուն թաղամասից եւ հարավային մուտքը Հաջր Ասուադի եւ Յալդայի ուղղությամբ: Դեռեւս տեղեկություններ չկան բանակի հարձակվելու մասին:
Սիրիական մեկ այլ աղբյուր տեղեկացրել է, որ Սիրիայի զինված ուժերի հրամանատարությունը հերքել է տեղեկությունն այն մասին, որ զինված խմբավորումները Հալեպում եւ Դարաայում ռազմակետեր են գրավել: Ղեկավարությունը հաստատել է, որ բանակը երկու օրվա ընթացքում ազատագրել եւ զինյալներից ամբողջովին մաքրել է գրավված տարածքները:
Սիրիայում շուրջ 21 ամիս շարունակվող բախումների հետեւանքով զոհվել է մոտավորապես 40 հազար մարդ: