2 րոպեի ընթերցում
ԵՐԵՎԱՆ, ՍԵՊՏԵՄԲԵՐԻ, ԱՐՄԵՆՊՐԵՍ: Ֆուտբոլի աշխարհի առաջնության ընտրական փուլի Հայաստան-Իտալիա խաղի 3000 դրամանոց տոմսերը վաճառքի կհանվեն սեպտեմբերի 27-ից:
Մունդիալ- 2014-ի ընտրական փուլի Հայաստան-Իտալիա խաղի տոմսերը վաճառքի էին հանվել դեռ սեպտեմբերի 24-ին, սակայն 3000 դրամ արժողությամբ տոմսերը չկային վաճառքում: Ինչպես «Արմենպրես»-ին տեղեկացրին Վազգեն Սարգսյանի անվան Հանրապետական մարզադաշտի տոմսարկղից, յարուսի համար նախատեսված տոմսերը երկրպագուների համար հասանելի կլինեն վաղվանից` սեպտեմբերի 27-ից: Հայաստան-Իտալիա խաղի տոմսերը վաճառվում են նաեւ «Hummel» մարզահագուստի խանութում: Բայց այնտեղ նույնպես 3000 դրամ արժեցող տոմսեր չկան: Խանութի աշխատակցի խոսքով, այդ տոմսերը կլինեն առաջիկա երկու օրերի ընթացքում:
Ավելի վաղ «Արմենպրես»-ը գրել էր, որ տոմսերի գների հետ կապված աղմուկից հետո տոմսերի գները չեն վերանայվի: «Տոմսերի գները չեն վերանայվի: Սահմանված գները միջազգային կարգին համապատասխանող են: Դրանք մի քանի անգամ ավելի ցածր են նմանատիպ միջազգային այլ հանդիպումների տոմսերի գներից: Եթե մինչ այս կար երեք «հնարավորություն», այս անգամ դրանք չորսն են` 3000, 5000, 7000 եւ 10000 դրամանոց»,-ասել էր Հայաստանի ֆուտբոլի ֆեդերացիայի նախագահի խորհրդական Արայիկ Մանուկյանը:
Հայաստան-Իտալիա ֆուտբոլի աշխարհի առաջնության ընտրական փուլի հանդիպումը կկայանա հոկտեմբերի 11-ին «Հրազդան» մարզադաշտում: