2 րոպեի ընթերցում
ԵՐԵՎԱՆ, 10 ՕԳՈՍՏՈՍԻ, ԱՐՄԵՆՊՐԵՍ: Հայ ժողովուրդը մշտապես հատուկ հարգանք է ունեցել հայ շինարարի հանդեպ, եւ շինարարի մասնագիտությունը պատմության մեջ արժեւորվել է: Օգոստոսի 10-ին` Շինարարի մասնագիտական տոնի առթիվ կազմակերպված հանդիսավոր միջոցառման ժամանակ այս մասին նշեց Հայաստանի Հանրապետության վարչապետ Տիգրան Սարգսյանը: «Այդ ամենի վառ վկայությունն են այն կոթողները, որոնք մենք ժառանգություն ենք ստացել, եւ այն նոր ճարտարապետական շինությունները, որոնք կերտվում են ապագա սերունդների համար: Համոզված եմ, որ այս ոլորտում մենք ունենք նշանակալի ձեռքբերումներ եւ ներուժ»,-«Արմենպրես»-ի փոխանցմամբ` ընդգծեց վարչապետը:
ՀՀ քաղաքաշինության նախարար Սամվել Թադեւոսյանը նշեց, որ հայ շինարարը բոլոր ժամանակներում իր կառուցածի, վաստակի համար այնքան բարձր է գնահատվել, որ հային «շինարար ազգ» գնահատականն է տրվել: «Թեպետ այս տարվա շինարարության ոլորտի ցուցանիշերը համեստ են, սակայն աղետի գոտում ոչ մի ծրագիր չի կրճատվել. մեկ ամսից Գյումրիում շահագործման կհանձնվի 1756 բնակարաններից բաղկացած 38 բազմաբնակարան շենքերը: Մինչեւ տարեվերջ կլուծվեն աղետի գոտում երկրաշարժի հետեւանքով անօթեւան մնացած շուրջ 4500 ընտանիքների բնակարանային խնդիրները»,-տեղեկացրեց նախարարը: Նա արձանագրեց, որ հանրապետությունում քաղաքաշինությունը լուրջ զարգացում է ապրել: Ներդրվում են նոր տեխնոլոգիաներ, շինանյութի նորագույն տեսակներ:
Շինարարի տոնի առթիվ, ինչպես նաեւ երկարամյա ու անբասիր աշխատանքային գործունեության եւ քաղաքաշինության բնագավառում ներդրած ավանդի համար ՀՀ վարչապետի հուշամեդալով պարգեւատրվեցին եւ շնորհակալագրերով խրախուսվեցին քաղաքաշինության նախարարության մի խումբ աշխատակիցներ:
«Քաղաքաշինության բնագավառում նշանակալի ավանդի համար» ՀՀ քաղաքաշինության նախարարը Ոսկե մեդալով պարգեւատրեց ճարտարապետեր Արթուր Մեսչյանին եւ Տիգրան Բարսեղյանին, շինարար` Արագած Ախոյանին: