«Ոսկե ծիրան»-ում հայազգի ռեժիսորների ֆիլմերը կմրցեն խաղարկային եւ վավերագրական ենթաբաժիններում

ԵՐԵՎԱՆ, 15 ՀՈՒՆԻՍԻ, ԱՐՄԵՆՊՐԵՍ: «Ոսկե ծիրան» Երեւանի 9-րդ միջազգային կինոփառատոնի «Հայկական համայնապատկեր» ծրագիրն այս տարի բաժանված կլինի երկու` խաղարկային (կարճամետրաժ եւ լիամետրաժ) եւ վավերագրական ենթաբաժինների:

«Արմենպրես»-ի հաղորդմամբ` այդ մասին այսօր լրագրողների հետ հանդիպման ժամանակ նշեց «Ոսկե ծիրան» Երեւանի միջազգային կինոփառատոնի «Հայկական համայնապատկեր» ծրագրի համադրող, կինոգետ Րաֆֆի Մովսիսյանը: Նրա խոսքով` այս բաժանումը չափազանց կարեւոր էր, քանի որ դժվար է ընտրություն կատարել լավ խաղարկային կամ լավ վավերագրական հայկական ֆիլմերի մեջ: Նրա խոսքով` իրենք այս անվանակարգում ստացել են մասնակցության 70 հայտ, որոնցից ընտրվել են մրցութային ծրագրում մասնակցելու 28 ֆիլմ:

«Հայկական համայնապատկեր» մրցույթը, որ ներկայացնում է հայազգի ռեժիսորների ֆիլմերը, կներկայացնի 6 լիամետրաժ խաղարկային, 5 կարճամետրաժ խաղարկային, 15 վավերագրական ֆիլմ:

Լիամետրաժ խաղարկային ֆիլմերն են` Վալերի Մասադյանի «Նանա», Միքայել Վաթինյանի «Ժաննան եւ ձայները», Նատալյա Բելյաուսկենեի «Եթե բոլորը», Արա Երնջակյանի «Հոբելյանական հաճախորդը», Վահագն Գրիգորյանի «Ես եմ», Արմեն Ռոնովի «Իմ փոքրիկ իշխանը» ֆիլմերը: Կարճամետրաժ խաղարկային ֆիլմերն են` Ավո Կապրիելյանի «Երոկւ քայլ էլ», Տիգրան Ավետիքյանի «Վատ հայրը», Էրիկ Նազարյանի «Պոլիս», Լուսկա Կապալյանի «Յոթերորդը» եւ Նարինե Մալյանի «Որդու ծննդյանը սպասող հյուսնը» ֆիլմերը:

«Հայկական համայնապատկերի» վավերագրական ֆիլմերն են` Տատյանա Դանիլյանցի «Լողացող Վենետիկը», Արմեն Գասպարյանի «Հայկական հաց», Սյուզան Խարտալյանի «Տատիկիս դաջվածքները», Ռենդի Բելի, Էրիկ Խաչիկյանի «ՈՒղեւորություն. Ամասիա», Էդուարդ Հովհաննիսյանի «Առնո», Հակոբ Գուդսուզյանի «Հայկական արձագանքներ», Անետա Օհանջի «Արզուման», Միշա Ղազարյանի «Արմինեն եւ լեդի Մակբեթը», Արթուր Խուդոյանի «Ինձ աշուղ են ասում», Հայկ Կբեյանի «Կոստան Զարյան. Հայ գրականության միայնակ հոգին», Վահե Յանի «Երկու ճանապարհ», Նիկոլ Պեզճյանի «Կոշիկներս թողել եմ Ստամբուլում», Գոռ Մանգասարյանի «Քաղաքում շատ շներ կան», Արսեն Գասպարյանի «Նոր Ջուղա. Լինել» եւ Տարոն Պետրոսյանի «Տղաներիս հետ միասին» ֆիլմերը: «Հայկական համայնապատկեր» ժյուրիի կազմում կլինեն Լի Սանգ Յոնգը, Էմիլիա Հավիրովան, Վալերի Բալայանը, Ադելինա ֆոն Ֆուրցենբերգ, Սիտորա Ալիեւան, Վիկեն Բերբերյանը:

«Ոսկե ծիրան» Երեւանի 9-րդ միջազգային կինոփառատոնն իրականանում է ՀՀ մշակույթի նախարարության աջակցությամբ: