Համայնքապետի ընտրություններ` Մարալիկում

ԳՅՈւՄՐԻ, 26 ՍԵՊՏԵՄԲԵՐԻ, ԱՐՄԵՆՊՐԵՍ: Կիրակի' սեպտեմբերի 25-ին, Մարալիկում տեղի ունեցան համայնքապետի ընտրություններ: Ընտրություններին մասնակցում էր մեկ թեկնածու' գործող համայնքապետ Արտակ Գեւորգյանը (ՀՀԿ):

Մինչ ընտրարշավի մեկնարկը, թիվ 36 ընտրատարածքային ընտրական հանձնաժողովներում իր թեկնածությունն էր առաջադրել նաեւ Աղասի Կարապետյանը՝ անկուսակցական, ով ավելի ուշ ինքնաբացարկ հայտնեց:

Ինչպես «Արմենպրես»-ի թղթակցին տեղեկացրեց Շիրակի մարզպետարանի հասարկության հետ կապերի պատասխանատու Սամվել Գրիգորյանը, ընտրություններին մասնակցելու իրավունք ունեցող 5297 ընտրողներից ընտրությանը մասնակցել է 2093-ը: Արտակ Գեւորգյանը օգտին է քվեարկել 2014 ընտրող, դեմ՝ 49-ը, 30 քվեաթերթիկ ճանաչվել է անվավեր:

Արտակ Գեւորգյանը, չնայած իր երիտասարդ տարիքին (ծնվել է 1977 թվականին), առաջադրվում է արդեն երրորդ անգամ, եւ երեք անգամ անընդմեջ վերջինիս հաջողվում է ընտրվել համայնքի ղեկավար: