1 րոպեի ընթերցում
ԳՅՈՒՄՐԻ, 2 ԱՊՐԻԼԻ, ԱՐՄԵՆՊՐԵՍ: Մայիսի 6-8-ը Կոմիտասի անվան պետական կոնսերվատորիայի Գյումրու մասնաճյուղում կգումարվի «Մշակույթների երկխոսություն. համաշխարհային մշակույթը եւ Հայաստանը» միջազգային հինգերորդ նստաշրջանը, որը նվիրված է հայ անվանի կոմպոզիտոր, ԽՍՀՄ ժողովրդական արտիստ Էդվարդ Միրզոյանի ծննդյան 90- ամյակին:
Ինչպես «Արմենպրես»-ին տեղեկացրեց գիտաժողովի պատասխանատու, երաժշտագետ Հասմիկ Հարությունյանը, գիտաժողովը հնարավորություն է ընձեռելու վերստին թերթելու եւ վերաարժեքավորելու կոմպոզիտորի ստեղծագործությունները:
«Գիտաժողովի ընթացքում ներկայացվելու են ավելի քան վաթսուն նյութեր ինչպես հանրապետության, այնպես էլ արտերկրի' Ռուսաստանի, Վրաստանի, Թուրքիայի, հեղինակավոր գիտական եւ կրթական կենտրոնների ներկայացուցիչների կողմից: Ներկայացվող նյութերում լինելու են պատմամշակութային բացահայտումներ, հետազոտությունների արդյունքներ, տեսակետներ»,-նշեց Հ. Հարությունյանը:
Հավելենք, որ գիտաժողովի շրջանակներում անցկացվելու են նաեւ կլոր սեղաններ, քննարկումներ, իսկ վերջում կհրատարակվի գիտաժողովի նյութերի ժողովածուն: