1 րոպեի ընթերցում
Գեղարքունիքի մարզի Մարտունի համայնքի Ծովինար գյուղում ՀՀ կառավարության կողմից իրականացվող սուբվենցիոն ծրագրերի շրջանակներում ընթանում են խմելու ջրատարի ներքին ցանցի կառուցման աշխատանքները «Ալվաղ» թաղամասում։
Ինչպես «Արմենպրես»-ին տեղեկացրեց Ծովինարի վարչական ղեկավար Արթուր Կարապետյանը, գյուղի խմելու ջրատարի կառուցման ծրագրի պայմանագրային արժեքը կազմում է 21 միլիոն 595 հազար դրամ, որի 70 տոկոսը հատկացնում է ՀՀ կառավարությունը, 30 տոկոսը՝ Մարտունիի համայնքապետարանը։
Ծրագրով նախատեսված է խմելու ջրատարի ներքին ցանցի կառուցում նորաստեղծ «Ալվաղ» թաղամասում՝ 500 մետր երկարությամբ։
Սեպտեմբերին մեկնարկած շինարարական աշխատանքները իրականացվել են շուրջ 80 տոկոսով։
Ծրագրի իրականացման արդյունքում նորաստեղծ թաղամասի տնտեսությունները կապահովվեն շուրջօրյա ջրամատակարարմամբ։