Երևանի մնջախաղի պետական թատրոնը Մոսկվայում հանդես է եկել ներկայացմամբ

Ռուսաստանի Դաշնությունում Հայաստանի Հանրապետության մշակույթի օրերի շրջանակներում Երևանի մնջախաղի պետական թատրոնը Մոսկվայի հանդիսատեսի դատին է ներկայացրել «Օֆլայն» ներկայացումը։

Բեմադրության հիմնական գաղափարը երիտասարդության՝ սոցիալական ցանցերից կախվածության ընդգծումն է։

Մոսկվայում «Արմենպրես»-ի թղթակցի հետ զրույցում դրամատուրգ, սցենարական վարպետության ու դրամատուրգիայի տեսության մասնագետ Մարիկա Գևորգյանը նշել է, որ բեմադրության հիմքում իրականությունը ներկայացնելու գաղափարն է դրված։

«Այն, ինչ տեսանք բեմում, առաջին հայացքից ֆանտաստիկա է թվում։ Բայց, եթե փորձենք կողքից նայել ինքներս մեզ, կտեսնենք, որ մենք նույնպես ապրում ենք զուգահեռ ստեղծված ֆանտաստիկ աշխարհում, որտեղ սոցիալական ցանցերը հաճախ ծածկում են մեր իրականությունը՝ կանոններ ու անգամ էսթետիկա թելադրելով։

Ներկայացումն առիթ է տալիս խորհելու՝ արդյոք ճի՞շտ է այսպես ապրելը, թե՞, այնուամենայնիվ, այն կործանարար կարող է լինել։ Ու, այո, ասելիքը շատ ավելի խորն էր, քան առաջին հայացքից թվում է»,- ընդգծել է արվեստաբանը։