Իրանի փոխնախագահը մեծարել է իրանահայ ականավոր արվեստագետ Լորիս Ճգնավորյանին

Իրանի փոխնախագահ Սեյյեդ Համիդ Փուրմոհամադին նոյեմբերի 9-ին Երևանի Կապույտ մզկիթում Ֆիրդուսու «Շահնամե»-ի հայերեն թարգմանության շնորհանդեսի շրջանակում հանդիպել է իրանահայ անվանի կոմպոզիտոր և դիրիժոր Լորիս Ճգնավորյանի հետ՝ բարձր գնահատելով նրա ողջ կյանքի ընթացքում ծավալած արժեքավոր գործունեությունն ու արվեստի բնագավառում ստեղծած նշանակալի գործերը։

«Արմենպրես»-ին այս մասին հայտնեցին Հայաստանում Իրանի դեսպանությունից։

Հանդիպման ընթացքում Փուրմոհամադին, երախտագիտություն հայտնելով Ճգնավորյանին երաժշտության ոլորտում նրա թողած անգնահատելի ավանդի համար, ընդգծել է արվեստագետի կարևոր դերը Իրանի մշակույթի և գրականության հանրահռչակման, ինչպես նաև Իրանի և Հայաստանի ժողովուրդների միջև մշակութային կապերի ամրապնդման գործում։

Անդրադառնալով Ճգնավորյանի հեղինակած «Ռոստամ և Սոհրաբ» օպերային՝ նա ընդգծել է Ֆիրդուսու «Շահնամե»-ի ստեղծագործական մեծ ներուժը՝ անմահ երաժշտական և բեմական երկերի ստեղծման գործում։

Ճգնավորյանը, խոսելով մանկուց «Շահնամե» -ի և Ֆիրդուսու էպիկական պատմությունների հանդեպ ունեցած իր խորը սիրո մասին, անդրադարձել է այս գրական ժառանգության ազդեցությանը սեփական ստեղծագործական ուղու ձևավորման վրա՝ ընդգծելով Իրանի և Հայաստանի միջև մշակութային ու գեղարվեստական համագործակցության ընդլայնման կարևորությունը։ Նա նաև Իրանի և Հայաստանի ժողովուրդներին բնորոշել է որպես մեկ միասնական և անբաժանելի հոգի՝ նշելով, որ քաղաքական սահմանները չեն կարող բաժանել նրանց։

Միջոցառման ընթացքում ականավոր արվեստագետին նվիրել են Ֆիրդուսու «Շահնամե»-ի  շքեղ, բացառիկ հրատարակություններից մեկը։ Իսկ Իրանի մշակույթի և իսլամական առաջնորդության նախարարության գեղարվեստական հարցերով փոխնախարար Մեհդի Շաֆիին նրան է հանձնել նախարարի շներհալագիրը՝ ի նշան երաժշտության ոլորտում երկարամյա արժեքավոր գործունեության և նշանակալի ծառայությունների գնահատանքի։