Երևանյան հռչակագիրը կարևոր քաղաքական աջակցություն է COP17-ի բանակցություններին. Համբարձում Մաթևոսյան
3 րոպեի ընթերցում
Կենսաբազմազանության առաջնորդների՝ Հայաստանում անցկացված գագաթնաժողովն առաջնորդների ամենամասշտաբային, ներառական և ընդգրկուն գագաթնաժողովն էր, որը երբևէ կազմակերպվել է կենսաբազմազանության վերաբերյալ կողմերի համաժողովների շրջանակում։
«Արմենպրես»-ի հաղորդմամբ՝ այս մասին լրագրողների հետ ճեպազրույցում ասաց ՀՀ Շրջակա միջավայրի նախարար Համբարձում Մաթևոսյանը՝ անդրադառնալով առաջնորդների գագաթնաժողովի արդյունքներին։
Նրա խոսքով՝ Հայաստանը կարողացել է լուծել իր առջև դրված խնդիրը՝ COP17-ի պաշտոնական բանակցությունների մեկնարկից առաջ կազմակերպելով առաջնորդների գագաթնաժողով, որին մասնակցել են ոչ միայն երկրների և կառավարությունների ղեկավարներ, այլև ոլորտի առաջնորդներ, միջազգային կառույցների ղեկավարներ։
«Միջոցառման և քննարկումների կարևորագույն նպատակներից մեկը COP17-ի քաղաքական ազդեցության բարձրացումն էր, ընդհանրապես՝ կենսաբազմազանության օրակարգի նկատմամբ քաղաքական մակարդակում ավելի մեծ ուշադրություն սևեռելը»,- նշեց Մաթևոսյանը։
Նա ընդգծեց, որ գագաթնաժողովի կարևորագույն արդյունքը Երևանյան հռչակագիրն է, որը քաղաքական աջակցություն կապահովի COP17-ի բանակցությունների համար։ «Որպես COP17-ի նախագահ՝ կարծում եմ, որ այդ փաստաթուղթը կարևորագույն նշանակություն կունենա Հայաստանի նախագահության և մեր թիմի աշխատանքի համար՝ որպես քաղաքական աջակցություն, որը թույլ կտա ավելի սահուն անցկացնել բանակցությունները»,- ասաց նա։
Մաթևոսյանի խոսքով՝ առաջիկա աշխատանքների կարևոր ուղղություններից մեկը COP-ի երկրների և քաղաքական միավորների հետ համագործակցությունն է՝ հասկանալու համար, թե ինչ քայլեր պետք է իրականացվեն կենսաբազմազանության պահպանության ուղղությամբ առաջիկա չորս տարիներին։
«Պետք է ոչ միայն արձանագրենք խնդիրները, այլև հասկանանք, թե գալիք չորս տարիների ընթացքում աշխարհն ինչ աշխատանք պետք է իրականացնի այս ուղղությամբ։ Երևանյան հռչակագիրը լավագույն մեկնարկն էր և առաջնորդների կողմից COP17-ին ցուցաբերված կարևոր քաղաքական աջակցությունը»,- հավելեց նախարարը։