2 րոպեի ընթերցում
Ռուսաստանի Դաշնությունում Հայաստանի Հանրապետության դեսպանատան մշակույթի կենտրոնում կազմակերպվել է «Առաջին քրիստոնեական պետությունը» ֆիլմաշարի «Լուսավորիչը» ֆիլմի հատուկ ցուցադրություն:
«Արմենպրես»-ի թղթակցի փոխանցմամբ` միջոցառումը կայացել է Մշակույթի կենտրոնի նախաձեռնած «Երիտասարդական ինտելեկտուալ հարթակ» ծրագրի շրջանակներում, որտեղ ներգրավված են Մոսկվայի բուհերի հայազգի ուսանողները:
Մշակույթի կենտրոնի ղեկավար, ծրագրի համակարգող Վլադիմիր Գաբբեն իր խոսքում նշել է, որ հարթակի ստեղծումից և վեր կազմակերպվել են ավելի քան երկու տասնյակ միջոցառումներ` տարբեր ձևաչափերով։
Նա կարևորել է երիտասարդների` արդեն ավանդական դարձած հանդիպումները դեսպանատան հարկի ներքո, ընդգծել, որ դրանք ճանաչողական, լուսավորչական, ինտելեկտուալ, երաժշտական, հայկական ավանդական բնույթ ունեցող միջոցառումներ են, որոնք միշտ անցնում են ջերմ ու ոգևորող մթնոլորտում:
Ֆիլմի դիտումից հետո ծավալվել է ակտիվ քննարկում. ուսանողները կարծիքներ են հնչեցրել, ինչպես նաեւ բարձրացրել ծագած հարցերը: Նշենք, որ «Երիտասարդական ինտելեկտուալ հարթակ» կրթամշակութային նախագիծը գործում է ընթացիկ տարվա փետրվարից: Այն ստեղծվել է ՌԴ-ում ՀՀ դեսպանատան Մշակույթի կենտրոնին կից և ընդգրկում է Մոսկվայի բուհերի հայազգի ուսանողներին: