Առաջիկայում կքննարկվեն զոհված զինծառայող Ալբերտ Հովհաննիսյանի հուշապատկերի պահպանման տարբերակները. Երևանի քաղաքապետի խոսնակ
1 րոպեի ընթերցում
Երևանի քաղաքապետի խոսնակ Ջուլիետա Ազարյանը հանդիպել է 44-օրյա պատերազմում զոհված զինծառայող Ալբերտ Հովհաննիսյանի հոր՝ Արտակ Հովհաննիսյանի հետ։ Ինչպես տեղեկացնում է «Արմենպրես»-ը, Ազարյանը «Ֆեյսբուք»-ի իր էջում գրել է, որ քննարկել են Ալբերտի հուշապատկերի հետագա պահպանման հնարավոր լուծումները։
«Հարկ եմ համարում ընդգծել, որ հարցը Երևանի քաղաքապետ Տիգրան Ավինյանի ուշադրության կենտրոնում է։ Առաջիկայում կքննարկվեն հնարավոր տարբերակները, և այս հարցը կստանա արժանի ու լավագույն լուծումը՝ առաջին հերթին հաշվի առնելով Ալբերտի հիշատակի նկատմամբ մեր հարգանքը և հանրային ընկալումը։ Փա՛ռք մեր բոլոր նահատակներին»,– գրել է Ազարյանը։
Ալբերտ Հովհաննիսյանի պատկերը հեռացվել էր Երևանի «Հաղթանակ» զբոսայգու գլխավոր մուտքի պատից, ինչից հետո սոցիալական ցանցերում բուռն քննարկումներ էին սկսվել։ Քաղաքապետարանը պարզաբանել էր, որ պատը մաքրվել է վերականգնման աշխատանքներից առաջ, և հերքել էր պատկերը միտումնավոր հեռացնելու մասին պնդումը։