Իրաքը վերահսկողություն է հաստատել Բաղդադի միջազգային օդանավակայանում գտնվող ԱՄՆ ուժերի գլխավոր շտաբի նկատմամբ

Իրաքի Անվտանգության հարցերով լրատվական կենտրոնը (Security Media Cell) հայտարարել է, որ պաշտոնապես ստանձնել է Բաղդադի օդանավակայանում գտնվող ԱՄՆ ուժերի գլխավոր շտաբի՝ «Հաղթանակի ճամբարի» նկատմամբ վերահսկողությունը։ «Արմենպրես»-ի փոխանցմամբ՝ այս մասին հաղորդում է Իրաքի ազգային լրատվական գործակալությունը (NINA):

«Բաղդադի օդանավակայանում ԱՄՆ շտաբի հանձնումը և Բաշիկա բազայից թուրքական ուժերի դուրսբերման վերաբերյալ համաձայնությունը ներկայացնում են երկու կարևոր քայլ՝ ուղղված Իրաքի ինքնիշխանության և պետական ​​հաստատությունների իշխանության ամրապնդմանն ամբողջ տարածքում», - հայտարարել է կենտրոնի ղեկավար, գեներալ-լեյտենանտ դոկտոր Սաադ Մաանը։

Նա պարզաբանել է, որ այս զարգացումներն ընդգծում են միջազգային գործընկերների հետ անվտանգության ոլորտում համագործակցության շարունակականության հնարավորությունը, որը հիմնված է փոխադարձ հարգանքի վրա, և այնպիսի եղանակով, որը պահպանում է իրաքյան կողմի որոշումների կայացման անկախությունը։

Մաանը հավելել է, որ Իրաքի ինքնիշխանության ամրապնդումը և անվտանգության հարցերի ինքնուրույն կառավարումն առանցքային նշանակություն ունեն երկրի կայունության, ինչպես նաև տարածաշրջանային և միջազգային հարաբերությունների զարգացման համար։

Սաուդական Ajel առցանց թերթի փոխանցմամբ՝ Իրաքի ռազմաօդային ուժերի հրամանատար, գեներալ-լեյտենանտ և օդաչու Խալիդ աթ-Թամիմին հայտարարել է, որ 2026 թվականի սկզբից ի վեր միջազգային կոալիցիան Իրաքի տարածքում որևէ առաքելություն չի իրականացրել՝ նշելով, որ ներկայում բոլոր օդային գործողություններն իրականացվում են ինքնուրույն։ Նա պարզաբանել է, որ իրաքյան F-16 կործանիչներն արդեն ավելի քան 10 օր է՝ առաքելություններ են իրականացնում առանց արտաքին միջամտության, և որ այդ ինքնաթիռների տեխնիկական սպասարկումն ամբողջությամբ իրականացվում է իրաքյան անձնակազմի կողմից։

Աթ-Թամիմին հավելել է, որ Իրաքը բանակցություններ է վարում տարբեր երկրների հետ Rafale-ի նման առաջադեմ ինքնաթիռներ ձեռք բերելու համար՝ նպատակ ունենալով հիմնել ժամանակակից ռազմաօդային ուժեր:

Իրաքն, ինչպես ակնկալվում է, սեպտեմբերի 30-ին կավարտի իր համագործակցությունը միջազգային կոալիցիայի հետ, որն աջակցում է ԻՊ-ի դեմ պայքարի ջանքերին՝ անցում կատարելով երկկողմ հարաբերությունների, որոնք հիմնված կլինեն կոալիցիայի որոշ երկրների հետ կնքված համաձայնագրերի վրա՝ աջակցելու սպառազինության ծրագրերին, անվտանգության ուժերի վարժանքներին և պատրաստվածության բարձրացմանը: