Հայաստանն ու ԱՄՆ-ն ամփոփել են պաշտպանական համագործակցության ծրագրերը և ստորագրել արձանագրություն
2 րոպեի ընթերցում
ՀՀ պաշտպանության նախարարության վարչական համալիրում սեպտեմբերի 18-ին անցկացվել են Հայաստան-ԱՄՆ երկկողմ պաշտպանական խորհրդակցությունները, որոնց ավարտին կողմերը ստորագրել են կատարված աշխատանքների և ձեռք բերված պայմանավորվածությունների վերաբերյալ արձանագրություն։
Ինչպես «Արմենպրես»-ը տեղեկանում է ՀՀ պաշտպանության նախարարությունից, խորհրդակցություններին մասնակցել են ՀՀ ՊՆ ներկայացուցիչներ, ԱՄՆ Կանզասի ազգային գվարդիայի հրամանատար, բրիգադի գեներալ Փոլ Շնեյդերը, ինչպես նաև ԱՄՆ պատերազմի դեպարտամենտի տարբեր կառույցների ներկայացուցիչներ։
Խորհրդակցությունների ընթացքում ամփոփվել են վերջին տարիներին Հայաստանի և ԱՄՆ-ի միջև պաշտպանության ոլորտում համագործակցության շրջանակում իրականացված ծրագրերը։ Կողմերը նաև ուսումնասիրել են համագործակցության բոլոր ուղղություններով փոխգործակցության հետագա զարգացման ներուժը։
Գեներալ-մայոր Արթուր Երոյանը, ամփոփելով խորհրդակցությունների արդյունքները, ընդգծել է, որ նշված բոլոր ուղղություններով համագործակցությունն իրականացվում է ՀՀ զինված ուժերի կերպափոխման գործընթացի շրջանակում։
ԱՄՆ պատերազմի քարտուղարի փոխտեղակալ Էնդրյու Լումիսը նշել է, որ Միացյալ Նահանգները կշարունակի աջակցել Հայաստանում իրականացվող պաշտպանական բարեփոխումներին։
«ԱՄՆ-ն կշարունակի աջակցել Հայաստանում իրականացվող պաշտպանական բարեփոխումներին՝ դրա շրջանակում իրականացվող բանակի կերպափոխման գործընթացներում ներդնելով իր խորհրդատվական, փորձի փոխանակման, նաև այլ ուղղություններով աջակցության ծրագրերի ամբողջ կարողությունը»,-նշել է Լումիսը։