2 րոպեի ընթերցում
Գերմանիայի արևմուտքում գտնվող Այֆել լեռնաշղթայում հրշեջներին հաջողվել է կասեցնել Հյուսիսային Հռենոս-Վեստֆալիա դաշնային երկրամասի պատմության մեջ ամենախոշոր անտառային հրդեհի տարածումը։ Ինչպես տեղեկացնում է «Արմենպրես»-ը՝ վկայակոչելով Deutsche Welle-ն, այդ մասին հայտնել է Դյուրենի շրջանային վարչակազմի ղեկավար Ռալֆ Նոլտենը։
Ըստ նրա՝ գիշերային ինտենսիվ աշխատանքներից հետո իրավիճակը դեպքի վայրում զգալիորեն կայունացել է։ Անտառի վրա նախորդ օրերին նկատվող ծխի հսկայական սյունն այլևս չկա։
«Նախորդ օրվա համեմատ իրավիճակը զգալիորեն փոխվել է. եթե երեկ հրդեհի դեմ իսկական պայքար էր ընթանում, ապա այժմ արտակարգ իրավիճակների ծառայության խմբերն ավելի վերահսկելի գործողություններ են իրականացնում»,- հավելել է Նոլտենը։
Այֆել շրջանում բռնկված հրդեհը նախկինում ընդգրկել էր մոտ 300 հեկտար անտառային տարածք, ինչը համարժեք է մոտավորապես 420 ֆուտբոլային դաշտի։
Հրդեհաշիջման աշխատանքներում ներգրավված է շուրջ 1400 փրկարար ծառայող։ Իշխանությունների տվյալներով՝ հրդեհի գոտում կրկին գործում են Ազգային ոստիկանության, նահանգային ոստիկանության և Բունդեսվերի ուղղաթիռները։ Կրակի դեմ պայքարի համար ընդհանուր առմամբ տասը ուղղաթիռ է կիրառվում։ Զինվորականները նաև շարունակում են լայն հակահրդեհային գոտիներ ստեղծել՝ կանխելու կրակի տարածումը անտառի նոր հատվածներում։