1 րոպեի ընթերցում
«Դնեպրովսկի էներգամեխանիկական գործարան» (ԴԷՄԳ) ընկերությունը Լիտվայում կկառուցի զինամթերքի արտադրության գործարան: «Արմենպրես»-ի փոխանցմամբ՝ այս մասին հաղորդում է Լիտվայի ազգային հեռուստատեսության և ռադիոյի LRT հարթակը։
Ըստ հրապարակման՝ Լիտվայի էկոնոմիկայի և նորարարության նախարարությունը հայտարարել է ընկերության հետ խոշոր նախագծի շուրջ ներդրումային համաձայնագրի ստորագրման մասին։
ԴԷՄԳ-ն Պրենայի շրջանում կկառուցի զինամթերքի հավաքման ժամանակակից արտադրամաս, ինչպես նաև արդեն գոյություն ունեցող արդյունաբերական ենթակառուցվածքները կօգտագործի Ալիտուսի արդյունաբերական պարկում զինամթերքի բաղադրիչների արտադրության համար։
Ձեռնարկությունը կդառնա «ընկերության արտադրության և նորարարությունների տարածաշրջանային կենտրոն, որտեղ կմշակվի և կթեստավորվի ՆԱՏՕ-ի չափանիշներին համապատասխանող նոր արտադրանք»։
Շինարարությունը նախատեսվում է սկսել 2026 թվականի աշնանը։