2 րոպեի ընթերցում
Պակիստանի արտաքին գործերի նախարարության խոսնակ Թահիր Անդրաբին օգոստոսի 12-ին մամուլի ասուլիսում նշել է, որ երկիրն աշխատում է ԱՄՆ-ին և Իրանին «բանակցային սեղանի շուրջ բերելու» և խաղաղության գործընթացը խաթարելու ջանքերը կանխելու ուղղությամբ։ «Արմենպրես»-ի փոխանցմամբ՝ այս մասին հաղորդում է Al Jazeera-ն։
«Պակիստանը կշարունակի չեզոքացնել խափանողներին՝ օգտագործելով ուղղակի և անուղղակի ուղիներ, և հնարավորություն կտա կառուցողական երկխոսության շարունակմանը՝ բոլոր չլուծված հարցերը լուծելու համար», - հավելել է նա՝ առանց նշելու որևէ երկրի կամ դերակատարի անուն, որին համարում է «խափանող»։
Անդրաբին հավելել է, որ Պակիստանը շարունակում է ներգրավված լինել այլ մուսուլմանական պետությունների հետ՝ Մերձավոր Արևելքում և Պարսից ծոցում ճգնաժամը լուծելու ջանքերում։
Նրա խոսքով՝ Պակիստանի փոխվարչապետը և արտաքին գործերի փոխնախարարը օգոստոսի 10-ին բանակցություններ են վարել Իրանի, Սաուդյան Արաբիայի և Քուվեյթի պաշտոնյաների հետ։
Անդրաբին նաև նշել է, որ Պակիստանի և Իրանի արտաքին գործերի նախարարները մտքեր են փոխանակել «խաղաղությունն ու կայունությունը խթանելու ջանքերի» շուրջ։
Պակիստանի ներքին գործերի նախարար Մոհսին Նաքվիի՝ օգոստոսի 11-ին Իրան կատարած այցի վերաբերյալ խոսնակը նշել է, որ այն ևս մեկ հնարավորություն է տալիս՝ քննարկելու երկկողմ հարաբերությունները և տարածաշրջանային անվտանգությունը։
Անդրաբին նաև անդրադարձել է Սաուդյան Արաբիայի, Թուրքիայի և Պակիստանի միջև կնքված Մեքքայի համատեղ պաշտպանության համաձայնագրին՝ այն որակելով որպես Պակիստանի՝ «Սաուդյան Արաբիայի հետ իր ռազմավարական գործընկերությունն ամրապնդելու» ջանքերի մի մաս։
Խոսնակի մեկնաբանությունները հնչում են ԱՄՆ-ի և Իրանի միջև հրադադարի վերականգնման, ինչպես նաև Հորմուզի նեղուցի շուրջ վեճերը լուծելու նպատակով փոխըմբռնման հուշագրի իրականացման շարունակական ջանքերի ֆոնին։
Պակիստանը կարևոր միջնորդական դեր է խաղում փետրվարին մեկնարկած ԱՄՆ-Իրան հակամարտության կարգավորման գործում։