Օվերչուկը հայտարարել է ՀՀ-ի ու ՌԴ-ի միջև առևտրաշրջանառության ցուցանիշի կտրուկ անկման մասին

Ռուսաստանի փոխվարչապետ Ալեքսեյ Օվերչուկը հայտարարել է, որ Ռուսաստանի և Հայաստանի միջև առևտրաշրջանառությունը կտրուկ նվազել է։ Նրա խոսքով՝ 2026 թվականին այս ցուցանիշը 2025 թվականի համեմատ նվազել է երկու երրորդով և կշարունակի նվազել։  

«Արմենպրես»-ի հաղորդմամբ՝ այս մասին հայտնում է ՏԱՍՍ-ը՝ վկայակոչելով ՌԴ փոխվարչապետի հայտարարությունը։

«ԵԱՏՄ-ի և Հայաստանի միջև հարաբերություններում զարգացող իրավիճակը կանխատեսելի էր։ Վերջին երեք-չորս տարիների ընթացքում մենք մեր հայ գործընկերներին ասում էինք, որ նման ռիսկեր կան, մասնավորապես՝ առևտրաշրջանառության անկման ռիսկը»,-հայտարարել է Ռուսաստանի փոխվարչապետը։  

Նա մանրամասնել է, որ 2024 թվականին Հայաստանի և Ռուսաստանի միջև առևտրաշրջանառությունը հասել էր ռեկորդային մակարդակի՝ մոտ 12 միլիարդ դոլարի։  

«Անցյալ տարի այն նվազել է և հասել է մինչև մոտ 8 միլիարդ դոլարի։ Այս տարի առևտրաշրջանառությունը կտրուկ նվազում է․ այն նվազել է մոտ երկու երրորդով՝ 2025 թվականի մակարդակի համեմատ։ Իրավիճակն այնպիսին է, որ այն ակնհայտորեն կշարունակի նվազել»,-հայտարարել է Օվերչուկը։

Հիշեցնենք, որ Ռուսաստանը Հայաստանում հունիսի 7-ին կայացած ընտրություններին ընդառաջ սահմանափակումներ էր մտցրել հայկական բազմաթիվ ապրանքների ներմուծման նկատմամբ։