Սլովակիայի և Ռումինիայի ԱԳ նախարարները շնորհավորել են Արարատ Միրզոյանին Հայաստանի ԱԳ նախարարի պաշտոնում վերանշանակվելու առթիվ

Սլովակիայի և Ռումինիայի արտաքին գործերի նախարարներ Յուրայ Բլանարն ու Օանա-Սիլվիա Ցոյուն շնորհավորել են Արարատ Միրզոյանին՝ Հայաստանի Հանրապետության արտաքին գործերի նախարարի պաշտոնում վերանշանակվելու կապակցությամբ։

«Արմենպրես»-ի հաղորդմամբ՝ այս մասին Սլովակիայի և Ռումինիայի ԱԳ նախարարները գրառումներ են կատարել X-ի իրենց միկրոբլոգներում։

Մասնավորապես Յուրայ Բլանարն Արարատ Միրզոյանին հաջողություններ է մաղթել ԱԳ նախարարի պաշտոնում և համագործակցության խորացման պատրաստակամություն հայտնել։

«Մաղթում եմ Ձեզ հաջողություններ և անհամբեր սպասում եմ մեր համագործակցության շարունակությանը՝ Սոլավակիա-Հայաստան բարեկամական հարաբերությունների հետագա զարգացման գործում»,-գրել է Սլովակիայի ԱԳ նախարարը։

🇸🇰 Minister J. Blanár: Congratulations to @AraratMirzoyan on his reappointment as Minister of Foreign Affairs of the Republic of #Armenia 🇦🇲 I wish you every success and look forward to continuing our cooperation in further developing friendly Slovak-Armenian relations.

— Slovakia MFA 🇸🇰 (@SlovakiaMFA) August 4, 2026

Ռումինիայի ԱԳ նախարարը ևս շնորհավորել է Միրզոյանին՝ ակնկալելով երկկողմ հարաբերությունների հետագա ամրապնդում։

«Անհամբեր սպասում եմ Ձեզ հետ մեր ռազմավարական գործընկերության զարգացման և հաղորդակցության նախագծերի հետագա ամրապնդման ուղղությամբ շարունակական աշխատանքին։

Ռումինիան կշարունակի լինել վստահելի գործընկեր՝ առաջ մղելու Հայաստան-Եվրամիություն հավակնոտ օրակարգը, որտեղ դիմակայունությունն ու ժողովրդավարական բարեփոխումները կարևորագույն նշանակություն ունեն»,-գրել է Օանա-Սիլվիա Ցոյուն։

Congratulation to my friend & colleague, foreign minister @AraratMirzoyan for his reappointment as FM of #Armenia.
Looking forward to continuing working with you on enhancing our Strategic Partnership and for further strengthening connectivity projects. 🇷🇴 will continue to be a… pic.twitter.com/iY887lHmLo

— Toiu Oana (@oana_toiu) August 4, 2026

Հիշեցնենք, որ Հայաստանի կառավարությունը օգոստոսի 2-ին հրաժարական էր ներկայացրել, քանի որ այդ օրը մեկնարկել էր հունիսի 7-ին Հայաստանում կայացած խորհրդարանական ընտրությունների արդյունքներով ձևավորված խորհրդարանի առաջին նստաշրջանը։ Հայաստանի Սահմանադրության համաձայն՝ նոր խորհրդարանի առաջին նստաշրջանի մեկնարկի օրը ՀՀ կառավարությունը պետք է հրաժարական ներկայացնի ՀՀ նախագահին։ Վարչապետ Նիկոլ Փաշինյանն օգոստոսի 2-ին ստորագրել էր ՀՀ կառավարության հրաժարականի դիմումը, որն ուղարկվել էր ՀՀ նախագահի աշխատակազմ։ Նախագահը հաստատել էր Կառավարության հրաժարականը, որից հետո արդեն նոր ձևավորված խորհրդարանում մեծամասնություն ստացած «Քաղաքացիական պայմանագիր» կուսակցությունը վարչապետի պաշտոնում ներկայացրել էր Նիկոլ Փաշինյանի թեկնածությունը, ինչի հիման վրա էլ ՀՀ նախագահը Փաշինյանին վերանշանակել էր վարչապետի պաշտոնում։

Օգոստոսի 3-ին վարչապետ Նիկոլ Փաշինյանի առաջարկությամբ ՀՀ նախագահ Վահագն Խաչատուրյանը նշանակել էր նաև նախարարներին և փոխվարչապետերին։ Արարատ Միրզոյանը վերանշանակվել է ՀՀ արտաքին գործերի նախարարի պաշտոնում։

Նիկոլ Փաշինյանը ներկայացրեց նոր Կառավարության կազմը։ Արարատ Միրզոյանը վերանշանակվել է արտաքին գործերի նախարարի պաշտոնում։