Վահագն Ալեքսանյանը խորհրդարանում հարգալից քաղաքական բանավեճի կոչ է արել

Ազգային ժողովի նախագահի տեղակալի թեկնածու Վահագն Ալեքսանյանի գնահատմամբ՝ ութերորդ գումարման Ազգային ժողովի գործունեության արդյունքում արձանագրվել է «Իրական Հայաստանի» գաղափարախոսական հաղթանակը, որն ամրագրվել է 2026 թվականի խորհրդարանական ընտրությունների արդյունքներով։ «Արմենպրես»-ի հաղորդմամբ՝ Ալեքսանյանն այս մասին հայտարարել է Ազգային ժողովի իններորդ գումարման առաջին նստաշրջանում ունեցած ելույթում։

Ելույթի սկզբում նա շնորհակալություն է հայտնել Հայաստանի քաղաքացիներին՝ նշելով, որ նրանք, իր գնահատմամբ, չեն ենթարկվել ընտրությունների ընթացքում իրականացված տեղեկատվական ճնշումներին և ընտրակաշառքի միջոցով իրենց կամքի վրա ազդելու փորձերին։

«Չնայած ամբողջ տեղեկատվական տեռորին, չնայած միլիոնավոր, տասնյակ և հարյուրավոր միլիոնավոր դոլարներին, որոնք այս ընտրությունների ընթացքում բաժանվեցին ընտրակաշառքի տեսքով, որոնք գործածվեցին ձեր կամքը գնելու և կոտրելու համար, դուք, միևնույն է, թույլ չտվեցիք, որ դա տեղի ունենա։ Դուք չկոտրվեցիք, չվաճառեցիք ձեր պետությունն ու ձեր խիղճը»,- ասել է Ալեքսանյանը։

Նա ներողություն է խնդրել քաղաքացիներից՝ նշելով, որ իշխանությունը բավարար ջանք չի գործադրել ընտրական հնարավոր խախտումները նախապես կանխելու համար։

«Գուցե մեր զգոնությունը փոքր-ինչ բթացել էր, և չէինք սպասում, որ որոշ խմբեր կփորձեն այդքան բացահայտ, մեծ գումարների ներհոսք ապահովելով և նման միջոցների դիմելով, Հայաստանում վերացնել ժողովրդավարական կարգերը։ Այդ ուղղությամբ աշխատանքներն արդեն սկսել ենք ընտրությունների հաջորդ օրվանից՝ օրենսդրական փոփոխությունների տեսքով, և վստահաբար կշարունակենք իններորդ գումարման խորհրդարանի աշխատանքի ընթացքում»,- նշել է նա։

Ալեքսանյանը համաձայնել է, որ նախորդ գումարման խորհրդարանն ունեցել է վստահության ցածր մակարդակ, բայց այն որակել է անկախ Հայաստանի պատմության կարևորագույն խորհրդարաններից մեկը։

«Ութերորդ գումարման խորհրդարանի ընթացքում վերջնական լուծում տրվեց մի կարևոր հարցի՝ ո՞րն է մեր հայրենիքը։ Հայաստանի ապագան կանխորոշող առաջին լուրջ քաղաքական բանավեճը և հակամարտությունը տեղի ունեցան հենց այդ խորհրդարանում»,- ասել է նա։

Ալեքսանյանը հիշեցրել է, որ վարչապետ Նիկոլ Փաշինյանն Ազգային ժողովի ամբիոնից հայտարարել էր, որ Հայաստանի Հանրապետության տարածքը 29 հազար 743 քառակուսի կիլոմետր է։

Նրա գնահատմամբ՝ այդ հայտարարությունից հետո ծավալված քաղաքական բանավեճի արդյունքում ընդդիմադիր ուժերը ևս իրենց գործունեությունը սկսել են կառուցել Հայաստանի միջազգայնորեն ճանաչված տարածքի շրջանակում։

«Ութերորդ գումարման խորհրդարանի աշխատանքների վերջում ընդդիմությունն ամբողջությամբ ընդունեց Իրական Հայաստանի գաղափարախոսության բացարձակ և ջախջախիչ հաղթանակը։ Այդ գաղափարախոսական հաղթանակն արտացոլվեց խորհրդարանում և ամրագրվեց ընտրությունների արդյունքներով»,- հայտարարել է Ալեքսանյանը։

Անդրադառնալով իններորդ գումարման Ազգային ժողովի աշխատանքին՝ Ալեքսանյանը նշել է, որ քաղաքական բանավեճերի բովանդակությունը կարող է ամբողջությամբ չփոխվել, սակայն արդեն նկատելի է տոնայնության և բառապաշարի փոփոխություն։

«Ոչ ոք չի ասում՝ չքննադատենք կամ մեղադրանքներ չհնչեցնենք։ Ես, օրինակ, համարում եմ, որ դուք այստեղ եք հայտնվել, որովհետև ձեր քաղաքական թիմի ներկայացուցիչներն ընտրակաշառք են բաժանել։ Բայց ձեզ դիմելիս ասելու եմ «պարոն», «տիկին» և «հարգելի գործընկերներ»։ Քանի դեռ հակառակը չեմ տեսել կամ լսել, ձեզ հետ խոսելու եմ հարգալից»,- ասել է նա։

Ալեքսանյանի համոզմամբ՝ եթե պատգամավորները պահպանեն փոխադարձ հարգանքի վրա հիմնված քաղաքական բանավեճի ոճը, Ազգային ժողովի նկատմամբ հանրային վստահությունը կարող է էականորեն աճել։

Նա միացավ ԱԺ նախագահ Ռուբեն Ռուբինյանի՝ խորհրդարանում բարեկիրթ և հարգալից խոսույթ ձևավորելու կոչին։