674 միլիոն 758 հազար դրամ ներդրմամբ Փամբակում 2018-2025 թթ-ին իրականացվել է սոցիալ-տնտեսական նշանակության 6 ծրագիր
1 րոպեի ընթերցում
Գեղարքունիքի մարզի Վարդենիս համայնքի Փամբակ գյուղում սուբվենցիոն և պետական ծրագրերի շրջանակներում 2018-2025 թվականների ընթացքում սոցիալ-տնտեսական և կենսական նշանակության 6 ծրագիր է իրականացվել, որոնց ուղղությամբ կատարված կապիտալ ներդրումները կազմել են 674 միլիոն 758 հազար դրամ։
«Արմենպրես»-ին Վարդենիսի համայնքապետարանից տեղեկացրին, որ իրականացված ծրագրերից 5-ը սուբվենցիոն են՝ 58 միլիոն 758 հազար դրամ ընդհանուր արժեքով, 1-ը՝ պետական՝ 616 միլիոն դրամ արժեքով։
Իրականացված ծրագրերի արդյունքում Փամբակում 2018-2025 թվականների ընթացքում կառուցվել են 4866 մետր խմելու ջրատարի ներքին ու արտաքին ցանցեր, 1000 մետր արտաքին լուսավորության ցանց, հիմնանորոգվել է 5500 մետր հանրապետական նշանակության ճանապարհ։
Պետական ծրագրով 2019 թվականին հիմնանորոգվել է Շողակաթ-Վարդենիս հանրապետական նշանակության ավտոճանապարհի՝ Փամբակի վարչական տարածքով անցնող հատվածը, շուրջ 616 միլիոն դրամ արժեքով։