1 րոպեի ընթերցում
ԱՄՆ նախագահ Դոնալդ Թրամփի հատուկ բանագնաց Սթիվ Ուիթքոֆն ուղևորվել է Կատարի մայրաքաղաք Դոհա, որտեղ հունիսի 30-ին սպասվում են ամերիկա-իրանական բանակցությունները: «Արմենպրես»-ի փոխանցմամբ՝ այս մասին հաղորդում է CNN-ը։
«Ուիթքոֆը ներկայում Դոհայի ճանապարհին է», - հաղորդել է հեռուստաալիքը՝ հղում անելով ամերիկացի երկու պաշտոնյայի։
Այն, թե արդյոք Ուիթքոֆին ուղեկցում է Միացյալ Նահանգների նախագահի փեսան՝ Ջարեդ Քուշները, չի նշվում։
Ավելի վաղ Սպիտակ տան խոսնակը հայտնել էր, որ Դոհա կմեկնեն Ուիթքոֆը և Քուշները։
Նախագահ Դոնալդ Թրամփը հունիսի 29-ին հայտնել էր երեքշաբթի օրը՝ հունիսի 30-ին, Դոհայում սպասվող ամերիկա-իրանական բանակցությունների մասին։ Սակայն Իրանի արտաքին գործերի նախարարության պաշտոնական ներկայացուցիչ Էսմայիլ Բաղային ավելի ուշ հայտարարել էր, որ առաջիկա օրերին Թեհրանն ամերիկյան կողմի հետ շփումներ չի պլանավորում Կատարում։ Իրանի արտաքին գործերի փոխնախարար Քազեմ Ղարիբաբադին նույնպես հերքել էր ԶԼՄ-ներում տարածված լուրերը, որ կողմերի միջև նախատեսվում են բանակցություններ։