Անկարան աջակցում է Հայաստան-Ադրբեջան խաղաղության գործընթացին. Թուրքիայի խորհրդարանի նախագահ

Թուրքիայի ազգային մեծ ժողովի նախագահ Նուման Քուրթուլմուշը հայտարարել է, որ Թուրքիան լիովին աջակցում է Հայաստանի և Ադրբեջանի միջև խաղաղության գործընթացին և հույս ունի, որ Հարավային Կովկասում կհաստատվի տևական խաղաղություն։

Ինչպես հաղորդում է «Արմենպրես»-ը, թուրքական «Անադոլու» լրատվական գործակալության փոխանցմամբ՝ Իսլամական համագործակցության կազմակերպության անդամ պետությունների խորհրդարանական միության համաժողովում ունեցած ելույթի ընթացքում Քուրթուլմուշն անդրադարձել է նաև Հարավային Կովկասի իրավիճակին։

«Մենք ողջունում ենք Ադրբեջանի և Հայաստանի միջև խաղաղ բանակցությունները, որոնք արդեն շոշափելի արդյունքներ են տվել։ Ցանկանում եմ վերահաստատել, որ մենք լիովին աջակցում ենք Կովկասում խաղաղության գործընթացին։ Հույս ունեմ, որ ինչպես ԱՄՆ-ի և Իրանի միջև կարգավորման դեպքում, այնպես էլ Կովկասում կհաստատվի ամուր և վերջնական խաղաղություն Ադրբեջանի և Հայաստանի միջև, և այս տարածաշրջանը կդառնա խաղաղության, կայունության և բարեկեցության տարածք»,- հայտարարել է Թուրքիայի խորհրդարանի նախագահը։