1 րոպեի ընթերցում
ԱՄՆ-ում ՀՀ դեսպան Նարեկ Մկրտչյանն այցելել է Վաշինգտոնում գործող ռազմավարական հետազոտությունների ուղեղային կենտրոն՝ CSIS, որտեղ հանդիպել է կենտրոնի Եվրոպայի, Ռուսաստանի և Եվրասիայի ծրագրի տնօրեն Մաքս Բերգմանի և այլ ներկայացուցիչների հետ։
«Արմենպրես»-ի հաղորդմամբ՝ ԱՄՆ-ում Հայաստանի դեսպանության տարածած հաղորդագրության մեջ նշվում է, որ հանդիպման ընթացքում Նարեկ Մկրտչյանը ներկայացրել է ՀՀ-ԱՄՆ համագործակցության օրակարգն՝ անդրադառնալով վերջերս ստորագրված մի շարք փաստաթղթերի։ Դեսպանը նշել է, որ դրանք համագործակցության նոր հնարավորություններ են ստեղծում բարձր տեխնոլոգիաների, արհեստական բանականության, կարևորագույն հանքանյութերի, կիսահաղորդիչների արդյունաբերության, էներգետիկայի և այլ ռազմավարական ոլորտներում։
Քննարկումների առանցքում են եղել նաև տարածաշրջանային զարգացումներն ու խաղաղության գործընթացին առնչվող հարցերը, այդ թվում՝ այդ գործընթացում Միացյալ Նահանգների դերակատարումն ու ներդրումը։
Հանդիպման ընթացքում քննարկվել են նաև CSIS-ի և հայկական հետազոտական ու վերլուծական կենտրոնների միջև համագործակցության հաստատման հնարավորությունները։