Իրանը 60 օրով չեղյալ է հայտարարել Հորմուզի նեղուցի տարանցման վճարը

Իրանի ազգային անվտանգության խորհուրդը հայտարարել է, որ Հորմուզի նեղուցով անցման համար դիմորդները 60 օրվա ընթացքում որևէ վճար չեն վճարի, և Իրանի Իսլամական Հանրապետության վարչակազմը կհոգա այդ ծախսերը։ «Արմենպրես»-ի փոխանցմամբ՝ այս մասին հաղորդում է իրանական IRNA  գործակալությունը։

Հայտարարության մեջ նշվում է, որ Պարսից ծոցի ջրային ուղիների վարչությանը հանձնարարվել է արագորեն մշակել և առաջնահերթություն տալ հարցումներին՝ ԱՄՆ-ի և Իրանի միջև պատերազմին վերջ դնելու վերաբերյալ Իսլամաբադի փոխըմբռնման հուշագրի նպատակներին հասնելու համար։

Նաև նշվում է, որ հաշվի առնելով անցման երթուղու հատուկ պայմանները և որոշ վտանգների առկայությունը, ինչպես նաև ելնելով անվտանգ երթևեկությունն ապահովելու և ծովային վթարները կանխելու անհրաժեշտությունից՝ նավերը պետք է անցնեն հայտարարված երթուղով և ժամին։

Իրանի Պարսից ծոցի նեղուցի վարչության (PGSA) հայտարարության համաձայն՝ Հորմուզի նեղուցով անցնել ցանկացող նավերը պետք է պաշտոնական ուղիներով ներկայացնեն տարանցման հայտ, ներառեն նավի կոնտակտային տվյալները և երթուղու մասին տեղեկությունները, հայտը ներկայացնեն նեղուց ժամանելուց առնվազն 48 ժամ առաջ և տարածք մուտք գործելուց առաջ համաձայնեցնեն երթուղին և տարանցման ժամանակը։

Իր հերթին, ԱՄՆ զինված ուժերի կենտրոնական հրամանատարությունը հունիսի 18-ի երեկոյան հայտնել է, որ հետևելով նախագահ Դոնալդ Թրամփի հրամանին՝ ԱՄՆ զինված ուժերը դադարեցրել են իրանական նավահանգիստների և ափամերձ տարածքների ծովային շրջափակումը։